#أوّلا /
لما بنقول شابّ – بنكون نقصد حدّ عنده من 30 ل 40 سنة
مش شابّ يعني متخرّج من الجامعة امبارح وبنقول له اشتغل وحوّش مليون جنيه
#ثانيا /
أيوه يا فندم عشرات ومئات وآلاف الشباب بتعمل كده
أنا لوحدي باقعد كلّ أسبوع تقريبا مع شابّ من دول في استشارة
ف تخيّل لو انا باقعد مع 50 واحد من دول في السنة – يبقى همّا كام – أكيد آلاف
ما انا مش واخد 100 % من السوق – ولا 10 % حتّى
#ثالثا /
أيوه وحضرتك عاوز البديل يكون إيه ؟!
يعني انتا لو شايف إنّك مش هتقدر تحوش مليون جنيه عشان تعمل مصنع – البديل إيه ؟!
إيه رأيك نعطيهم لك جدعنة منّنا طالما مش قادر تعملهم بنفسك
أو إيه رأيك تروح البنك وتدخل في ربا – ومن بعده خراب بيت
لإنّك لو ما قدرتش تحوّش مليون جنيه – عاوز تقنعني إنّك هتاخد مليون جنيه تشغّلهم وتكسب منهم 500 ألف في السنة مثلا – عشان تعطي البنك فوايده الأوّل – وبعدين يتبقّى لك ربحك انتا – مستحيل طبعا
أو – إيه رأيك تروح تقول لحدّ إنّك عندك فكرة هايلة – وإنّك عاوزه يدخل معاك مموّل
ونكتشف قدّام إنّك كان عندك فكرة هايلة فعلا – بسّ – عندك فكرة بسّ – لكن ما عندكش قدرة على النواحي الإداريّة ولا الفنّيّة
ف خدت الفلوس فلكحتها في الفاضي – ونقعد نفصل بينك وبين اللي عطاك الفلوس بقى في قعدة عرب
دي السيناريوهات البديلة عن إنّك تشتغل وتحوّش – تختار مين منهم ؟!
#رابعا بقى /
ودا الكلام اللي يزعّل – واللي انا سايبه للآخر – وهو – وانتا ليه ما قدرتش تشتغل وتحوّش المليون جنيه في مرحلة الشباب ( ما بين التلاتين والاربعين )
والإجابة – لإنّك بتتمرقع
إنتا قضّيت فترة تعليمك مرقعة وفرجة على الماتشات – ف طلعت زيّك زيّ الصينيّ بعد غسيله – مخّك فاضي – ف عاوز تشتغل شغلانة تجيب لك رقم تقدر توفّر منّه مليون جنيه ؟! بأمارة إيه ؟! عندك إيه تقدّمه لينا يعني نعطيك عليه الراتب الكبير ده ؟!
الشافعيّ رحمه الله كان ليه بيت مش فاكره حاليا – لكن مفاده هو إنّه بيكلّم حدّ عاوز يبقى عالم زيّه يعني – ف بيقول له – أنا بقيت عالم لإنّي سهرت الليالي أتعلّم – وانتا عاوز تبقى عالم وانتا مقضّيها لعب ؟!
أحد المتابعين الفضلاء ذكر البيت
أأبيت سهران الدجى و تبيته . نوما و تبغي بعد ذاك لحاقي
ف إنتا كنت مقضّيها لعب – وزميلك كان مقضّيها مذاكرة واجتهاد – ف طلع يقدر يشتغل شغلانة تجيب له دخل كبير – أو يعمل شغل فريلانس ويجيله دخل بالدولار مثلا
ف بين ال 30 وال 40 هيكون جمّع المليون اللي انتا مستغرب منّه ده – بعد مصاريفه بالمناسبة ومصاريف بيته – عادي
إنتا بقى مقضّيها شغل تقليديّ – وبعدين تتلفّت وتقول ( ألّلللاه – أمّال انا ما عملتش مليون جنيه ليه يا ولاد )
اللي جمّع المليون جنيه ده – كان عنده خطّة للحفاظ على نفقاته – بينما انتا كنت بتضيّع – ف مستغرب من الفرق بينك وبينه ليه
اللي جمّع المليون جنيه ده – مشي على خطّة مراحل العمل الأربعة – موظّف – عمل حرّ – بيزنس – استثمار
ف عمل جنب وظيفته عمل حرّ – لحدّ ما العمل الحرّ ده بقى بيجيب له من 5 ل 10 أضعاف راتبه – ف تفرّغ ليه – لحدّ ما بقى بيجيب له 20 ضعف راتب زميله – ف يقدر فعلا يحوّش المليون جنيه ده بسهولة – ف يبقى ليه عين يقول عاوز انتقل للمرحلة التالتة ( البيزنس )
ده الفرق حضرتك – الفرق عندك انتا
لو الظروف صعبة – ف هي صعبة على الجميع – عليك – وعلى اللي قدر يجمّع المليون جنيه ( وأكتر )
يبقى الفرق مش في الظروف – ولكن – الفرق في يا ترى كلّ واحد منكم اتعامل مع الظروف ازّاي
وترجع الناس تستغرب منّي لمّا تلاقيني بحارب الكورة مثلا – وانتا متخيّل إنّي باتكلّم في الموضوع ده من باب التفاهة ولّا العند مثلا !!
ما هو الشابّ التافه اللي بيتابع الكورة ده هيحوّش المليون جنيه ازّاي ؟!
مستحيل
زميله التاني بقى شايف مصلحته – وبيعمل في صمت – ف معقول جدّا إنّه يحوّش المبلغ ده – وأكتر
ثمّ !!
يجي لنا الأخّ ده اللي كان مقضّيها كورة – ويصرّخ ويقول انتوا ازّاي عاوزيننا نبدأ من الصفر بتاعنا إنّه يكون مليون جنيه
أيوه يا فندم – إحنا عاوزين كده – وانتا تقدر تعمل ده – بسّ لمّا تكون تصرّفاتك في اتّجاه توجّهاتك
توجّهاتك إنّك تحوّش مليون جنيه
لكن تصرّفاتك هي
استهتار في التعليم
استهتار في الشغل
تضييع فلوس أوّل بأوّل
ف هييجوا منين المليون جنيه ؟!
ولا ال 10 ألاف جنيه حتّى !!