بقالي سنين – ممكن من يوم ما فتحت المكتب – ما حسّيتش براحة البال – لكن – الحمد لله – بدأت احسّ بيها من أيّام فقط
ف خلّيني اقول لك على الأسباب اللي في نظري ممكن تعمل لك راحة بال
المفهوم الأهمّ في حياة الإنسان في رأيي – هوّا فهم الأرزاق
عشان كده عملت عنها حلقة في سلسلة مفاهيم مهمّة في البيزنس
وحلقة في سلسلة نصيحة من خبير
وحلقة في سلسلة الطريق إلى البيزنس
وناوي لمّا ارجع اصوّر فيديوهات اتكلّم تاني عن نفس المفهوم
معظم الناس فاهمين الأرزاق طبعا – بسّ فاهمينها غلط – ف فهمهم الغلط ده بيكون سببه قلق أكتر – بدل ما تكون نتيجته راحة البال
عشان تفهم الأرزاق حضرتك محتاج تتيقّن من الحاجات التالية
1 – الرزق ابتلاء – سواءا بالغنى أو الفقر – الاتنين ابتلاء
2 – الرزق غير مرتبط بالسعي – الرزق مرتبط بأنّ الله سبحانه وتعالى هو ( الربّ ) – ومن لوازم الربوبيّة أنّ الربّ يرزق عباده
السعي واجب عليك – لكن مش هوّا اللي بيجيب الرزق – لو ما سعيتش هيجي لك رزقك – لكن هتشيل ذنب عدم السعي
3 – لا يوجد اطمئنان للرزق – ممكن تكون غنيّ جدّا النهارده – وبكره تفتقر في لحظة – ف كده كده طالما ما فيش اطمئنان – يبقى اتطمّن !!
اتطمّن لإنّ قلقك مش هيفرق في حاجة – كده كده انتا معرّض تفلّس في لحظة – حتّى لو عشت في قلق طول الوقت مش هتقدر تغيّر القدر ده – يبقى اتطمّن !
ف لو فهمت ده – هتحسّ براحة البال
أو اسمه الدخل السلبيّ – لكن أنا سمّيته الدخل المحايد ف باعتزّ بهذه التسمية
الدخل المحايد هوّا إنّك يكون عندك مصدر دخل غير مرتبط بمجهودك الشخصيّ – وإنّك مطلوب منّك طول الوقت تبذل مجهود عشان تحقّق دخل
الدخل المحايد يعني الوصول لطريقة تدرّ عليك دخل دون الارتباط بإنّك لازم تكون موجود في موقع العمل
ودا تاني أهمّ مفهوم بعد مفهوم الرزق
يعني يكون عندك على الأقلّ مصدرين للدخل
و فيه فرق بين التعدّد والتنوّع
التعدّد يعني 2 أو 3 أو 5
لكن التنوّع يعني المصدرين يكونوا مختلفين عن بعض – بيبيعوا منتجين مختلفين – بيبيعوا في سوقين مختلفين – بيبيعوا لشريحتين من العملاء
لو عندك مثلا 10 مطاعم – ف ده تعدّد – لكن مش تنوّع
ويا سلام لو التنوّع ده يكون بين مصدرين متعارضين
يعني لو سوق منهم نام – التاني بيقوم – تكون مختارهم من البداية كده
يعني مثلا واحد عنده نشاط تجارة شقق – ف يقوم عامل النشاط التاني ( تأجير شقق )
ف لو الناس ما بقتش قادرة تشتري الشقق – هتروح لإنّهم يأجّروا الشقق – دا معنى مصدرين متعارضين – لو واحد نام التاني يقوم
ال 3 مفاهيم دول همّا أكتر مفاهيم ممكن تسبّب لك راحة البال
و لو نظرت ليهم تاني – هتلاقي التاني والتالت همّا من ( الدخل ) – واحد دخل محايد و وواحد دخل متنوّع – دخل – يعني من ( الرزق )
يعني رجعت للسبب الأوّل في راحة البال – وهوّا ( فهم الرزق )
لو فهمت الرزق فقط – أضمن لك راحة البال
ما انا فاهم الرزق ومش حاسس براحة البال ولا حاجة
ما دا اللي بقوله لحضرتك – إنّ معظم الناس فاهمين الرزق طبعا – بسّ فاهمينه غلط – لأ وبيستغربوا ليه مش حاسّين براحة البال !!
حتّى بعد ما قرأت اللي انا كاتبه ده – ف حضرتك بردو مش هتكون فاهم الرزق – ف هتفضل بعيد عن راحة البال
أخيرا
المفاهيم دي محتاجة سنييييين عشان تفهمها
إنتا النهارده قراتها – قرأتها فقط – وعرفتها – عرفتها فقط
لكنّ ما فهمتهاش
وما شوفتهاش
وما عشتهاش
ما انا عارف الكلام ده من سنين – ورغم ذلك ما كانش وصّلني لراحة البال
المعرفة خطوة واحدة من خطوات – الخطوات هي إنّك تشوف المفهوم ده بعينك – وبعد كده تعيشه بنفسك
لكن أديني قرّبتك خطوة – قدّامك خطوات بقى عشان تعيش مع المفاهيم دي – ولمّا توصل للتشبّع الكافي منها – ساعتها هتحسّ براحة البال إن شاء الله