بعد استشارة مع أحد العملاء وكنّا وصلنا لحوالي 70 % من اللي عاوزين نقوله قلت له خلّينا نوقّف الاستشارة حاليا ونرجع نكمّل بعد أسبوع أو أسبوعين
خلال الأسبوع أو الأسبوعين دول مطلوب من حضرتك تاخد الكلام دا وتنزل تطبّقه على أرض الواقع وتشوف إيه منّه واقعّيّ وإيه غير واقعيّ
الاستشارة لعميل خارج مصر ف متوقّع يكون فيه فروق ثقافات بين السوقين يعني
الكلام دا جاي منين ؟
جاي من دورة مهمّة جدّا لازم تطبّقها على كلّ شغلك
إسمها دورة PDCA
اختصارا ل Plan Do Check Act
وهتلاقي ناس عرب بيقولوها ( بيديكا )
بالعربيّ معناها
خطّط نفّذ قيّم عدّل
خطّط ونفّذ دي معروفة
لكن الإضافة في الدورة دي هوّا موضوع ( قيّم و عدّل )
يعني
لو أنا رايح من القاهرة لاسكندريّة مثلا
وانا طالع على أوّل الطريق لقيت يافطة مكتوب عليها الإسكندريّة 200 تمام
بعد 10 كيلو لقيت يافطة مكتوب عليها الإسكندريّة 190 تمام
طيّب إفرض واحد ما بيبصّش على اليفط دي طول الطريق متوقّع نجيبه من مرسى مطروح تاني يوم عادي جدّا
طيّب لو بعد يافطة الإسكندريّة 190 بعدها ب 10 كيلو لقيت يافطة مكتوب عليها مرسى مطروح 230
هوّا دا معنى ( قيّم )
ف قمت حضرتك واخد أوّل يوتيرن وراجع لطريق الإسكندريّة
هوّا دا معنى ( عدّل )
بعد ما مسكت طريق إسكندريّة تاني مشيت شويّة لقيت اسكندريّة 170 يبقى تمام
إسكندريّة 160 يبقى تمام
بنها 40
يبقى حضرتك دخلت طريق بنها
يبقى إيه يبقى انتا عملت ( قيّم ) لقيت نفسك انحرفت عن الطريق ف تقوم عامل إيه ( عدّل )
الكلام يبدو كلام مدارس ابتدائيّ خالص
لكن للأسف شركات كتير بتغلط فيه
تلاقي شركة مثلا بترفد موظّف بعد ما اشتغل عندها سنة وما نفعهمش بحاجة طول السنة دي
يا صبركم يا أخي اكتشفتوا بعد سنة !!
يبقى دول ما بيعملوش PDCA
المفروض الموظّف دا لو انتوا بتعملوا بي دي سي أيه فعلا كان اترفد بالكتير في تالت شهر قبل ما تكونوا صرفتوا على تدريبه
وأخطر من كده قبل ما تكتشفوا إنّكوا محتاجين 3 شهور تاني ع الأقلّ على ما تملوا المكان ده المكان اللي بقاله سنة ما بيضيفش
وفي البيزنس ما لم تتقدّم فأنت تتأخّر !!
يعني إنتا مش بس قعدت سنة ما بتتقدّمش حضرتك في الحقيقة بقالك سنة بتتأخّر لإنّ المنافس عنده موظّف في القسم دا من الشركة بيزقّ الشركة المنافسة للأمام بقاله سنة مدير تصدير مثلا
ف إنتا بقيت متأخّر عن الشركة التانية سنة مش فقط واقف في مكانك
مثال تالت
حضرتك تعبت رحت للدكتور كتب لك علاج
لو مش بتعمل بي دي سي أيه ممكن تفضل تاخد العلاج لمدّة شهر وما فيش تحسّن
ف لازم تعرف إنّ ال بي دي سي أيه دي مبنيّة على ( نقاط التوقّف والتقييم )
يعني ال mile stones
يعني اليفط اللي كانت بتظهر لك كلّ 10 كيلو على الطريق
ف وانا باخد العلاج من الدكتور المفروض اسأله ( متوقّع التحسّن يكون شكله عامل ازّاي يا دكتور )
ف يقول لك مثلا خلال يومين الحرارة هتنزل خلال أسبوع الصداع هيروح مثلا
ف لو عدّى اليومين والحرارة ما نزلتش يبقى دي مايل ستون نقطة توقّف ف لازم أراجع الدكتور ( قيّم )
ف الدكتور يكتب لي نوع دواء تاني ( عدّل )
ما يجيش حدّ مثلا يقول لي ( أنا هطوّر لك الصناعة المصريّة في 5 سنين بسّ تسيبني ما تروشنيش معاك أنا راجل صنايعيّ أحبّ اشتغل ببال رايق عشان اطلّع لك حاجة أوستيك )
أهلا وسهلا
يعني عاوزني أقعد ساكت من هنا ل 5 سنين ؟!
طاب افرض بعد 5 سنين اكتشفنا إنّك كنت ماشي غلط ؟!
ما هو بردو أنا ما اقدرش احقّق لك النتايج دي في يوم وليلة أنا مش ساحر
حلو
إعطيني نقاط مرجعيّة محطات توقّف
قول لي مثلا خلال 3 شهور هكون حلّيت لك مشكلة الطرق المكسّرة في المدن الصناعيّة
ولّا دي محتاجة 5 سنين ؟!
ف لو جيت بعد 3 شهور ولقيتك فعلا حلّيت المشكلة دي يبقى كمّل
لقيت الطرق زيّ ما هيّا يبقى خطّة ال 5 سنين دي غالبا مش هتكمل
عشان كده أمريكا فيها انتخابات رءاسة كلّ 4 سنين
مش دي النقطة
النقطة إنّ انتخابات الكونجرس كلّ 4 سنين بردو في منتصفات فترات الرءاسة
يعني إنتخابات الرءاسة هتكون في سنوات 2024 2028
إنتخابات الكونجرس هتبقى في 2026 2030
ف الرئيس يمسك في 2024
يادوب سنتين ويلاقي انتخابات على حزبه في الكونجرس مقابل الحزب المنافس
الانتخابات دي بتعتبر تقييم لآداء الرئيس ( وحزبه ) خلال منتصف الفترة
ف ييجي الحزب المنافس ياخد أغلبيّة سنة 2026 ودا اللي غالبا بيحصل
يا دوب سنتين وتلاقي انتخابات الرءاسة تاني في 2028
دي كلّها مايل ستونز نقاط توقّف وتقييم وتعديل