جمصة هي أقل مصيف في مصر . أو ممكن تاني أقل مصيف . ما اعتقدش إن فيه أقل منها إلا بلطيم
لكني دايما بصيف فيها . وباختار أقرب شقق للشط
دا معنى ( أعلى واحد في أقل مكان )
في المقابل
من فترة كنت بابحث عن فيلا للسكن في القاهرة الجديدة . سألت عن إيجارات الفيلل . لقيتها في المتناول بالنسبة لي الحمد لله
لكن !!
كنت هكون أقل واحد في القاهرة الجديدة
فرفضت
دا معنى ( أقل واحد في أعلى مكان )
السبب هو ( الحفاظ على القلب )
قلبك لو انتا في مكان فيه ناس أعلى منك . مش هيسلم
والسبب كان ( إنتا . واختياراتك )
انتا اللي اخترت لنفسك تحط نفسك في مكان هيكون أعلى منك . فما تلومش قلبك لما يزعل لما يشوف الناس اللي أعلى منك
دا كان اختيارك . ما حدش أجبرك
اللي أجبرك هو ( المنظرة والتفاخر ) . يبقى استحمل بقى
بينما . كان في اختيارك بردو إنك تحط نفسك في مكان متواضع ما تحسش فيه إن حد أعلى منك . فقلبك يظل سليم
ولما تبقى تقدر تعيش في المكان الراقي . وتكون أعلى واحد فيه . إبقى روحه
لكن ما تروحوش وانتا عارف إنك هتروح تلاقي نفسك أقل واحد فيه . وترجع تشتكي من قلبك !!