قلت في فيديو إني خرمت ١٠٠ جنيه كانت مقطوعة وملزوق فيها ٥ جنيه مكان القطع عشان ما حدش ياخدها مني ويتغش فيها
ف طلع لي بعض المحنكين يقولوا ما كنت توديها البنك المركزي وتاخد بدالها
ف طبعا عملت لهم بلوك
مش دا المهم
المهم إنك هيقابلك في حياتك ناس تنصحك نصايح زي كده
ينصحك تضرب مشوار للبنك المركزي تصرف فيه ٢٠٠٠ جنيه
عشان تنكظ ال ١٠٠ جنيه
ومش مهم معاه إنه كده خسرك ١٩٠٠ جنيه
وضيع لك يوم شغل يسوى آلاف الجنيهات
المهم يبان زعيم المحنكين . وهوا بيخرف عادي
للمرة المليون بقول لك ما تاخدش نصيحة من أي حد إلا لو كان فاهم في اللي بينصح فيه
٩٠ ٪ من اللي بيرزعوا نصائح هما غير مؤهلين لده
وللمرة الثانية بقول إن مش كل ما يبدو منطقيا هو صحيح
عادي جدا يكون كلام منطقي . لكنه غلط
ومش كل إنسان صادق في نصيحته . نصيحته صادقة
فكروني بردو أيام أزمة الدولار قلت إني اتحول لي مش فاكر ٥٠٠ دولار تقريبا من عميل خارج مصر
ف رحت أودعتهم في البنك بسعر البنك
وكانت مجزرة بلوكات بردو للمحنكين ساعتها
كانوا عاوزينني أسيب شغلي وافضي نفسي عشان اشوف ازاي هبيع ال ٥٠٠ دولار بأعلى سعر
بعد الليلة دي هكون كسبت لي ١٠ أو ٢٠ ألف جنيه
وعرضت نفسي لمخاطرة تجارة في العملة في دولة كانت كاشفة شعرها ساعتها وبتجري ورا تجار العملة
وموقف احمد ابو زيد معروف
أنا شخصيا عندي عميل اتشد في الموضوع ده . وما كانش هوا اللي بيتاجر كمان . دا تاجر اتمسك وبلغ عن عملاءه . وكان دا واحد من عملاءه
ف السادة الجهابذة كانوا عاوزينني أعرض نفسي لده عشان مكسب ١٠ آلاف جنيه
بينما هيا مش شغلتي أصلا
يعني
لو هيا شغلتي . مقبول إني أتحمل المخاطرة بتاعتها
لكن . لو مش شغلتي . ف ما يشغلنيش اكسب منها ١٠ آلاف جنيه
أنا أفضي نفسي لشغلي واكسب الرقم ده من شغلي أسرع وأضمن وأريح
للمرة المليون
تخير الناصحين