في كذا نقطة بشوف الناس بتكررهم كتير وحابب أعلّق عليهم.
الكلام هيبقى على مثال الـ Content أو المحتوى المكتوب، لكنه ينطبق على التصميمات، الفيديوهات، البرمجة، وكل التفاصيل التانية.
النقطة الأولى: “في شغلانة صناعة المحتوى، الموضوع متوقّف على نوع المحتوى أو جودته أو شكله، يعني يكتب بوست للفيسبوك غير إنه يكتبلك مسرحية أو ورقة علمية.”
الـ AI أحسن بمراحل من الأشخاص في النقطة دي. أغلب الناس اتعوّدت على نوع أو أنواع محددة من كتابة المحتوى، لكن الـ AI أشطر بكتير في كل الأنواع والصياغات. ممكن آه يبقى فيه شخص مستواه ٨/١٠ أو ٩/١٠ في نوع معيّن، لكن الـ AI بيبقى من ٧ لـ ٩/١٠ في كل الأنواع، غير كمان التمكن اللي صعب جدًا أي شخص يوصله في تظبيط الـ Tone of Voice والـ Different Styles لأكتر من شركة في مجالات مختلفة في نفس الوقت، وده غير كمان الـ Storytelling Techniques أو الـ Copywriting Formulas في جزء التسويق، واللي صعب جدًا، مهما كنت مين، تعرفهم كلهم… فضلًا عن إنك تعرف تستخدم إيه وإمتى.
فلو جرّبت تطلب من الـ AI يكتب (أو يصمّم) أي حاجة بأكتر من طريقة، هيبقى فعلاً أحسن بكتير من أي شخص.
النقطة التانية: “الذكاء الاصطناعي في جزء كبير منه هو إعادة تدوير للمحتوى اللي موجود بالفعل وبيحاول يلبّسه على مقاس المهمة اللي مطلوبة منه.”
النقطة دي أصلًا مش Valid إنها تتناقش، لإن ده بالضبط اللي أي شخص بيعمله. أي حد سواء هيكتب أو هيصمّم أي حاجة، بيُودَر عليها الأول، وأحيانًا كتير بيبقى الفرق الحقيقي بين حد مبتدئ وحد خبرة هو عدد الحاجات اللي شافها قبل كده ومعرفته بالموضوع.
فالـ AI برضه (رغم إنه مش بيكتب فعليًا، لكنه بيتوقّع الكلمة اللي بعدها) عنده خبرة أكبر بكتير لأنه اتدرّب على حاجات كتير جدًا، وبيقدر يعمل بحث في عدد مواقع أكتر بكتير جدًا.
أنا مثلًا لما استخدمت الـ Deep Research في أحد المرات، عمل بحث على أكتر من ٢٤٠ موقع! رقم صعب جدًا لأي حد يعمله كل مرة بيحتاج فيها بحث مطوّل في أي موضوع. وده غير كمان إن الشخص العادي هياخد وقت قد إيه علشان يعمل كده.
فالاحتمالات عند الـ AI أكبر بكتير من أي شخص.
النقطة التالتة: “الموضوع مختلف حسب نوع البيانات اللي متغذّي عليها ومتدرّب عليها. يعني في ذكاء اصطناعي متدرّب على زبالة الداتا اللي موجودة على الإنترنت بما فيها معلومات غلط أو طرق كتابة مش صح، وفي برامج تانية متدرّبة على بيانات نضيفة ومنقّحة.”
في الأغلب الناس اللي بتتكلم عن نتائج مبهرة للـ AI، بتتكلم عن النسخ الـ Pro في أغلب التولز، زي
ChatGPT – Perplexity – Gemini Advanced
لأن في فرق كبير في جودة المحتوى ما بين المجاني والمدفوع.
وكمان حاليًا بقى فيه فروق بين الـ Models المختلفة جوا نفس التولز، يعني مثلًا لو بتستخدم ChatGPT، فالنسخ المختلفة زي
4o أو 4.5 أو o1 أو o3
جودة نتائجها بتختلف وبتأثر في الشغل حسب الـ Case اللي شغال عليها.
النقطة الرابعة: “في وهم بيتباع إن الذكاء الاصطناعي يقدر ياخد مكان البني آدم.”
النقطة دي كان دايمًا بيتقال فيها إن الشخص اللي بيستخدم الـ AI هيقدر ينجز شغل (أكتر من شخص مع بعض أو شغل فريق كامل)، وده فعلاً كان بيحصل، والشاهد هو تطوّر الـ Quality بتاعت التول نفسها، لكن الفكرة دي مؤخرًا بقى عليها خلاف ومحدش متأكد منها، لإنها بقى ليها بُعد جديد.
إيه اللي اتضاف؟
في تول ظهرت من فترة قريبة جدًا اسمها Manus AI.
التول دي قادرة تعمل حاجات أبعد بكتير من اللي منتشر حاليًا عن قدرات الـ AI العامة.
يعني مثلًا، شخص طلب منها يعمل رحلة كام يوم لليابان وقال إنه هيعمل فيها Proposal، فالـ AI هنا ماكتفاش إنه يكتبله اقتراح أماكن أو جدول رحلة زي أغلب أدوات الذكاء الصناعي.
لأ، هو فكر في التجربة كلها، وده بان بوضوح في تخطيطه لرحلة اليابان اللي فيها “طلب زواج”.
ما اكتفاش إنه وزع الأنشطة على الأيام، لكن حدّد بدقّة توقيت الـ Proposal واختار اليوم المناسب بعد فترة كافية من التعود والاسترخاء في الرحلة.
كمان اختار المكان بعناية، مش مجرد مكان عشوائي، اقترح بحس بشري موقع زي بحيرة آشي مع خلفية جبل فوجي وقت الغروب، علشان اللحظة تبقى متكاملة.
Manus كمان راعى إن الرحلة تكون متوازنة، فوزّع الأنشطة بين الاستكشاف، الراحة، واللحظات الرومانسية، بدون زحمة أو إجهاد.
والأهم إنه ما اشتغلش كأنه بيطلع لستة أماكن وخلاص، بالعكس، ربط بين كل تفصيلة — من اختيار الفنادق، لتوقيت الأنشطة، لمسار الانتقالات — علشان يخدم الهدف الأكبر، وهو خلق تجربة Proposal مثالية مش مجرد برنامج سياحي.
طيب Manus عمل كده إزاي؟
لما الناس بصّت على الكود بتاعه، عرفوا إنه بيستخدم Claude AI من Anthropic، وحصل له ربط/تكامل مع تقريبًا ٢٩ تول جديدة، ودي أصلًا كانت مشكلة الـ AI ونقطة قوة Manus.
فالـ AI لوحده مجرد أداة لتوليد/توقّع النصوص، لكنه مكنش يعرف مثلًا:
هل اليوم ده فيه حجز طيران متاح؟
طيب لو فيه طيران، هل فيه عربيات متاحة للتنقل نقدر نحجزها؟
هل أصلًا الجو هيبقى مناسب؟ ولا اليوم ده هيبقى فيه مطر أو رياح أو حاجة تبوظ اليوم؟
وده اللي Manus نجح فيه، ودي كانت النقلة الجديدة.
بعدها OpenAI نفسها أعلنت إنها اعتمدت نظام اسمه Model Context Protocol (MCP) اللي عملته Anthropic، واللي هيخلي الـ AI يتحول من مجرد LLM لإنه يقدر يتواصل مع أي تول أو خدمة بسهولة، فموديل زي Manus هيتكرر كتير بأشكال مختلفة.
يعني الـ AI هيقدر يتواصل مع APIs و Databases و Devices مختلفة، وياخد قرارات بناءً على نتايج كل مرحلة علشان في الآخر يحقق الهدف.
فاللي بيحصل حاليًا، واللي هيحصل قدام، هيبقى دايمًا معتمد على الأشخاص.
لكن التطور خلي عدد الأشخاص اللي محتاجين يبقوا في العملية أقل بكتير، وفي نفس الوقت بيدي إمكانيات أعلى بكتير، وفي وقت أقل بكتير.
فالأشخاص هتفضل موجودة علشان تراجع وتتأكد من حاجات كتير، لكن اعتماد الشركات على الأشخاص (خاصة الـ mediocre) متوقع يقل جدًا.
الـ AI لسه موصلش للفكرة اللي بعض الناس بتتكلم عنها، إنك تدير شركتك كلها بـ AI و Automation ومن غير أي شخص وبدون تدخل بشري، لكن اللي حصل فعلًا هو تطور ضخم في كل Task لوحدها، وبدأ يبقى فيه تكامل بين التولز وبعضها.
فكل المطلوب مننا إننا نجري شويتين، ونجتهد على الأقل إننا نتابع اللي بيحصل ونتعود عليه، لإن تكلفة إنك ماتعرفش أو ماتتعودش عليه هتبقى فاتورتها كبيرة جدًا على أي حد.