خليني اقولك وجهة نظري
في موضوع السنيور ” Senior “
وخليني اقولك على اشهر ست انواع منهم
ومن الاول كده ان ده من خلاصة تجربتي الخاصه
وحتى الاسماء دي مسمياتي الخاصه لترتيب دماغي انا
سنيور بمزاجه
سنيور بالتقادم
سنيور قطاع عام
سنيور قطاع خاص
سنيور على وش عمل خاص
سنيور فشل في العمل الخاص
سنيور بمزاجه
وده شخص قرر بمزاجه الشخصي في مده قصيره انه بقى جامد في الحته بتاعته وبقى يقول على نفسه سنيور وده طبيعي لجرأة المبتدئين في اي شغلانه. وده المفروض لو عندك قليل من الخبره هتعرفه من الاول او هيبان من اول اسبوع في الشغل
سنيور بالتقادم
وده شخص لمجرد ان بقاله سنين في الشغلانه بقى اسمه سنيور وللاسف بيكون غالبا غير متطور وغير مواكب للجديد في مجاله والاسم هو سنيور وفي الفعل بيكون اقل من العادي وده للاسف مينفعش نهائي ولو مأخدتش بالك من قبل ما تعينه محتاج قوه نفسيه كبيره علشان تمشيه
سنيور قطاع عام
وده تقريبا نفس النوع السابق بس الفرق ان ده شايف احقيه كبيره ليه لمجرد انه قديم فقط يعني طالما انا بقالي معاكم عدد السنين الفلاني يبقى استحق المنصب او الدرجه الفلانيه زي شغل القطاع العام زمان ومش مهم يكون ناقصني حاجات كتيره او بحقق نتائج كبيره والخبره عنده تساوي عدد السنين فقط
سنيور قطاع خاص
وده افضل شخص ممكن تشتغل معاه لانه فاهم ان منصب اكبر يعني مسؤوليه اكبر وكل ما يطلب اكتر لازم يقدر يقدم اكتر وعارف انها مش بعدد السنين قد ما هي بالمعرفه والقدره على تحقيق نتائج فقط وان اصحاب الاعمال الموضوع عندهم حسابات مجرده وشكرا
سنيور على وش عمل خاص
وده بقى ممكن يكون اي نوع من السابق ذكرهم ولكن هو على وشك يبدأ مشروعه الخاص وده لو النوع المحترم وقالك يبقى تساعده بما لا يضرك ولكن للاسف اغلبهم مش بيقول وبيضرك ضرر كبير واولهم انه بيجرب فيك كل الحاجات اللي عايز يعملها عنده تحت غطاء التفويض واصبر تاخد حاجه نضيفه واللي ينجح تمام واللي يفشل يبقى الحمد لله يبقى ميعملوش هو بفلوسه في نفسه وتلاقيه بيغير وبيعدل كتير عندك للهدف ده واللي فيهم عايز يريح ضميره بيقول لنفسه انه مش قاصد يضرك لانه بيعمل فيك اللي كان عايز يعمله لنفسه يبقى يكركب الدنيا عادي جدا ولما تمشيه يبقى انت اضطريته يبطل شغل عند الناس ويبدأ عمله الخاص … شوف ازاي؟
وبالتالي هيحلل لنفسه انه ياخد عملاء او موردين او حتى موظفين معاه اللي بالمناسبه في بعض الاحيان هيكون كرهك فيهم قبل ما يمشي او رفدهم بنفسه قبل ما يمشي
سنيور فشل في العمل الخاص
وده شارح نفسه والخلاصه بلاش
لان الكويس فيهم نسبة 1 في المليون
وفي النهايه اكرر ان دي مجرد وجهة نظري