متخيل مدى اهتمامهم بيك وبتفاصيلك الداخلية ومدى درجة حشر نفسهم وسطينا بالعافية انهم عاملين حلقة عن صورة الفنان المصري محمد دياب اللي نشرها على حسابه الخاص وبيعلقوا عليها.
الصورة اللي نشرها وكاتب عليها ١٢٠ مليون وشق مصري اخدوها وعملوها محتوى وقاعدين يحللوها، عشان ببساطة ماشيين على نهج “اعرف عدوك”.
لما هناك حاطينك تحت المراقبة وبيدرسوا ادق تفاصيلك وبتفكر ازاي وايه اهتماماتك وايه التريند اللي داير عندنا وبنحب ايه ونكره ايه ومتابعين ايه وعارفين مشاهيرك واصحاب الرأي عندك ومثقفيك وفنانينك ولغتك ومشاكلك الداخلية فهما كدة عارفين هيدخلولك منين وايه اللي بيثير عواطفك وايه هيا نقاط ضعفك وقوتك.
انتا هنا بقا في المقابل تعرف ايه عنهم؟ مين هما مشاهيرهم؟ بيفكروا ازاي؟ ولا اي حاجة، فلما تواجههم في يوم من الايام وتلاقيهم بيفكروا بدماغك ومتوقعين كل ردود فعلك ومتفوقين عليك نفسيا وقادرين بتريند واحد يوقعونا في بعض متبقاش تزعل.
