من أكتر الصفات اللي بتبين مستوى عقل الإنسان . أو بكلمات أخرى . من أكتر الصفات اللي غيابها بيبين مستوى ضعف عقل الإنسان . هي إن الإنسان يكون بيتكلم الكلام اللي يتبنى عليه نتائج فقط . ويتعفف عن الكلام اللي ما نقدرش نبني عليه نتيجة أو نتخذ فيه إجراء . الكلام ده اللي بنسميه ( الهري )
يعني مثلا
الحكومة طلعت قرار بفرض ضريبة معينة
ف تلاقي ناس قاعدة تندب وتشتم و و و
الناس دي بتهري . ما تسمعلهمش
إسمع لحد هيكلمك عن إما ازاي تزود دخلك بحيث الضريبة الجديدة دي ما تأثرش على صافي ربحك
أو حد بيشرح لك ازاي تتجاوز الضريبة دي بشكل رسمي . أو تتهرب منها بشكل غير رسمي
لكن خليك انتا شتمت الحكومة . قمت انا شاتمها أكتر منك . استفدنا إيه احنا الاتنين
ياما عملت بلوكات لناس كانت طلباتها فقط إنهم عاوزينني أشتم الحكومة
آه وبعدين
شتمتها
هل مشكلتك اتحلت
لأ
بس ادينا بنهري . إنتا مش عاوز تهري معانا ليه
مثال تاني
راكبين ميكروباص وواقفين في طريق زحمة
ف تلاقي ناس بتشتكي من الزحمة والحر واللي متأخر عن شغله و و و
هل حد من حضراتكم يعرف طريق جانبي ممكن نخرج بيه من الزحمة دي
أيوه
يبقى إتفضل قول لنا
لأ
يبقى خلاص استمتعوا بالزحمة في صمت
لكن أنا مش هيزيد عليا حاجة لما اسمع شكوتك من الزحمة . بالعكس . هتوجع دماغي في الفاضي
زمان كنت استغرب قوي لما نكون راكبين ميكروباص . وراكب ينزل . ويقوم رازع الباب وهوا بيقفله . ويمشي
ف سواق الميكروباص يتحرك . وبعدين يقعد يشتكي من الراكب اللي رزع الباب
كنت اقول فى نفسي . حضرتك بتشتكي لنا إحنا ليه !! إحنا المؤدبين اللي ما رزعناش الباب
أو انزل قول الكلام ده للراجل اللي رزع الباب
دخلت كلية الظباط الاحتياط . ف كنا أحيانا نحضر طوابير . وفيه مجموعة من زمايلنا متأخرين . ف القائد يمسكنا يهزأنا احنا اللي في أرض الطابور . ويكلمنا عن ضرورة الانضباط وبتاع !!
يا فندم . إحنا اللي التزمنا بالطابور . حضرتك بتهزأ الناس الغلط . إنتا بتهزء المنضبطين فعلا . اللي المفروض يتهزؤوا مش موجودين أصلا
كل دا هري . كلام ما منوش فايدة . لإنه موجه للأشخاص غير ذوي الصفة أصلا
مثال تالت
واحد معاه ١٥٠ ألف جنيه . وعاوز يبقى صاحب مصنع ويؤمر وينهي في العمال ويبيع ويشتري في التجار
ف أقول له نحن متخصصون في المشاريع فيما فوق التلاتة مليون جنيه
ف يقول لي
وليه البلد ما تساعدش الشباب يعملوا مشاريع
إنتا بتسألني سؤال فلسفي خارج نطاق سلطتي أو حتى تأثيري
أنا فاتح دكانة دراسات جدوى . إنتا بتكلمني ويكإني وزير الاستثمار أو محافظ البنك المركزي
خليني تجاوبت معاك وانتا أقنعتني إنه فعلا المفروض الدولة تعطي الشباب فلوس عشان يهيصوا . هاعمل ايه انا بقى . هاصدر فرمان بتوزيع الدنانير على الشباب مثلا
أنا لو دخلت معاك في النقاش ده ابقى بهري زيك
لأ حضرتك اهري لوحدك
لازم تفهم إن الكلام زي الفلوس
والوقت زي الفلوس
ف
لا تتكلم كلام مالوش مردود
ولا تستهلك وقت في حاجة ما فيش منها عائد