لمّا بقول إنّ المناهدة اللي في الشعب المصريّ أساسها ( مشكلة في التعليم ) – مش بقول كده من فراغ
إمبارح كنت في استشارة مع عميل – مصريّ عايش في أستراليا من فترة
الاستشارة ما كمّلتش نصف ساعة تقريبا – قلت فيها اللي بقوله في اسستشارة تانية في ساعتين مثلا !!
الراجل بدأ الكلام بتعريف نفسه – بديهيّات – لكن عندنا في مصر تلاقي الواحد داخل يقول لك ( طابخين إيه النهارده ) – فتح كلام كده – من غير ما يقول لك أنا فلان من شركة كذا – ما بيقولش حتّى ( السلام عليكم ) !
ثانيا
بيسأل عن كذا – بيتعمل بالطريقة دي ولّا دي
بقول له بيتعمل كده – عشان كذا – يقول لي تمام
بسّ كده – من غير مناهدة
بيسأل عن كذا – صحّ اعمله ولّا غلط
بقول له غلط – عشان كذا
يقول لي ( معاك حقّ ) – بسّ كده – اللي بعده
نصف ساعة – لكن بقيمة ساعات
والفرق إيه
الفرق فرق ثقافة
الشعب هناك يتعامل كده – كلمة والردّ غطاها
الصحّ يبقى صحّ – وخلصنا
والغلط غلط – وخلصنا
مش تعالى نناهد ممكن نخلّي الغلط صحّ
طيّب – الثقافة دي جايّة منين
أساسها التعليم
التعليم عندنا اللي أساسه الرغي – والحفظ – بدون فهم – ف يطلّع لك واحد مستعدّ يقعد يهري بالساعات في الكلام وعكسه – عادي جدّا – ما هو بيتحاسب في ورقة الإجابة بالكيلو
التعليم عندنا غير التفاعليّ – يعني – ما فيش فيه إنّ الطالب يعمل تجربة مرّة إنّه يكلّم حدّ – ويتقال له انتا هنا اتكلّمت صحّ أو اتكلّمت غلط
ما فيش فيه تجربة إنّ الطالب يتطلب منّه مشروع – ف يحتاج يتواصل مع ناس عشان يشتري منهم حاجة أو يبيع لهم حاجة
ف بيطلع من التعليم يدخل الحياة ويكإنّه ما مرّش على تعليم أصلا !!
التعليم عندنا اللي بيتكلّم عن وهميّات – بدون الاحتكاك بالواقع
بيكلّمك مثلا عن تاريخ الفراعنة – لكن – مش هيكلّمك عن تاريخك المعاصر أصلا والعلاقات بين الدول ( حاليا )
ف بينمّي عندك ملكة الخيال الفارغ – ف تقعد تهري في أيّ خيال مستحيل يتحقّق
وتفتقد ( حسّ الواقع )
يعني مثلا – يطلع لك محلّ عنده 100 فرع – يقول لك الحقونا – هيخربوا بيت 25 ألف موظّف شغّالين عندنا
25 ألف موظّف على 100 فرع ازّاي
يعني كلّ فرع فيه 250 موظّف ؟! دا انتوا ولا فروع التوحيد والنور كده
لأ
عندنا خيال الشعب مش هيسأل السؤال ده
ليه ؟!
لإنّه خيال مربوط بأمور غير واقعيّة
ما حصلش مرّة إنّه يسألك سؤال ويعطيك إجابته – وبعدين يقول لك ( هل الإجابة دي منطقيّة ؟ )
ما حصلش ده
ف بيطلع الشعب ما عندوش منطق الأشياء
ف تيجي تتناقش معاه – يبهرك بقى بطريقة الكلام العايمة غير الواضحة أو المحدّدة
يهريك مناهدة !!