التصنيفات
مقالات الضيوف

المعلومة بدون قدرة زي الجهل بيها

اهم من المعلومة هو العميل اللي محتاج المعلومة

لو عندك معلومة بمليون جنية، تفتكر هتكسب مليون جنية؟

– الإجابة ” لا “

في أفضل الأحوال هتكسب ٢٠٠ الف جنية ٢٠٪؜ ده لو انت جامد ومتوفر عندك فرص وعلاقات كمان، لآن الواقع ملوش علاقة بالمنطق أو صح، ودي المغالطة اللي بيقع فيها ناس كتير ، انك تحسب الحياة وفقًا الصح وللمنطق ولحجم عملك وتعبك، فكرة ساذجة بيؤمن بيها اي طفل يعتقد ان اهله هكافؤه لو بقي شاطر او عمل الواجب او بقت اخلاقه كويسة، ممكن ده يحصل من اهلك علشان دول اهلك لكن في الواقع احنا مش اهلك ومنعرفكش أصلًا ومش محتاجين نكافئك علي اي عمل تقدمه لنفسك… نرجع للمثال بعض المقدمة دي :

لو نفترض انك عارف ان سهم في البورصة هيحقق مكسب ١٠٠٪؜ ممكن تكسب كام ؟ في الغالب هتكسب ضعف فلوسك، ولو تكن ان اجمالي مدخراتك ١٠٠ الف جنية فأنت هتكسب ١٠٠ زيهم ، وعلشان تكسب مليون لازم يبقي معاك مليون، إنما لو انت شاب طموح ومجتهد وبتذاكر ومعاك المعلومة لكن مش معاك رأس المال فأنت هنا هتبيع المعلومة لشخص يملك رأس المال وهو هيدفع ثمن المعلومة اللي في اقصي تقدير هتكون ٢٠٪؜ من المكسب … حلو ؟

مش حلو اوي … ليه؟ لانك لازم تدور في دائرة علاقتك عن شخص يملك ٥ مليون علشان يديك عمولة مليون وكمان يثق فيك وفي كلامك … طب لو مفيش الشخص ده، يبقي المعلومة دي متجبش ١٠ جنية حتي ، طب لو لاقيت شخص معاه ١٠٠ الف يبقي ثمن المعلومة بقي ٢٠ الف جنية بس ، لكن لو قدرت تبيع المعلومة لشخص عنده ١٠٠ مليون … مبروك انت بقي معاك ٢٠ مليون 😁

انا عايزك في البوست ده تتعلم كام نقطة :

– إحنا في عصر المعلومات وداخلين علي الذكاء الاصطناعي يعني المعلومة ثمنها غالي وهتفضل تغلي ولكن ثمن المعلومة من ثمن الشخص اللي هيستخدمها، يعني اهم من المعلومة هو العميل اللي محتاج المعلومة، وثمن المعلومة نفسها بتحدد في المكان اللي موجودة فيه، مثلًا هتلاقي معلومات علي الفيسبوك مجانًا لكن ثمن المعلومة هي وصلت لمين ؟

– لو وصلت لناس عادية هتاخد لايك ولاڤ..

– لو وصلت لحد احمق هتاخد هاهاها و انجري..

– لو وصلت لحد بيقدر هتاخد شكر ودعوة من القلب..

– لو وصلت لواحد عنده بيزنس هتاخد شغل بكام الف جنية..

– لو وصلت لمليونير هتاخد عقد بملايين … وهكذا

مينفعش تنزل تبيع ياخت في امبابة ومينفعش تبيع انترية مدهب في التجمع 😉 مشكلة الجيل الحالي والقادم مش في المعلومة ولكن في كيفية الوصول للمكان اللي تتقدر فيه المعلومة، لان الفلوس هتشتريها بالفلوس مش بمعلوماتك عنها، وبالتالي العصر الحالي الاكثر ظهور هو الاكثر مكسب او علي الاقل الاكثر تعرض للفرص، بس الاهم بتظهر فين وامتي ووسط مين ومين اللي شافك بالظبط، والاهم ان المعلومة بدون قدرة زي الجهل بيها بالظبط في النتائج …

ودائمًا بقول ان العلاقات بتكسب اكثر من العقارات

المصدر