من العلامات اللي بتخليني أنفر من حد صانع محتوى مثلا . أو أي متصدر لتعليم الناس . هي إنه يكون بيزيد متابعيه جهلا وليس علما !!
كمثال
أنا قبل ما اسمع الفيديو الفلاني للشخص العلاني . كنت أعرف معنى ١٠ كلمات إنجليزية . وأجهل معنى ١٠ كلمات إنجليزية
بعد ما سمعته . بقيت أجهل معنى ١٣ كلمة إنجليزية . هوا ضاف لي ٣ كلمات أنا مش عارف معناهم . وما شرحهمش !!
مثال ثاني
أنا قبل ما اسمع حضرتك . ما كنتش اعرف إن البرتقال مثلا ليه فوائد صحية رائعة
بعد ما سمعت حضرتك . بقيت مش عارف إيه هيا الفوائد الصحية الرائعة للبرتقال
حضرتك قلت إن البرتقال ممتاز . بس ما قلتلناش ممتاز في إيه !!
مثال ثالث /
حضرتك قلت إن اللي عاوز يتقدم لكلية الشرطة لازم تتوافر فيه صفات معينة طبعا . أمال إيه.
حضرتك كده كل اللي ضفته ليا هوا إني بقيت أجهل الصفات اللي المفروض تتوافر في الطالب اللي عاوز يتقدم لكلية الشرطة !!.
يا أهل الخير . اللي يشرح حاجة . يشرحها بشكل وافي . ويكون هدفه يرفع الجهل عن اللي بيتلقى منه . مش يكون هدفه يزيده جهلا . عشان يزيد هوا تميزا !!