إتكلمت عن المفهوم دا كتير قبل كده . لكن حاسس بيه أكتر دلوقتي وانا شايف نموذج قدامي ل أب مصمم يطلق بنته من جوزها
.
هوا متخيل إن دي معركة . ويهمه فيها إنه ينتصر
وممكن ينتصر فعلا
لكن . هل لو انتصر . هيكون كسب ولا خسر ؟!
.
إيه دا . ما هو طبيعي لو انتصر يبقى كسب
.
لا يا مون بيه
ما هو دا البوست ودا الموضوع
.
ممكن جدا تنتصر . وتخسر
وممكن جدا تنهزم . وتكسب
.
البنت اللي طلبت الطلاق دي وحاربت عليه وفي النهاية انتصرت واتطلقت
يا ترى دي كسبت ولا خسرت ؟!
.
ما نعرفش
هنعرف لما نشوف هوا كان صح إنها تتطلق ولا لأ
.
النصر غير المكسب
.
ممكن تنتصر في جدال مع أبوك . كده انتا خسرت
.
ممكن تضرب إبنك وتخليه يسمع كلامك غصب عنه . كده انتا خسرت
.
ممكن تقطع قلب عمالك في الشغل عشان تكسب أكتر . كده انتا خسرت
.
ممكن زوجة تحط جوزها قدام خيار يا تطلقني يا أنكد عليك عيشتك يا تسيب لي البيت أمشيه بمزاجي وانتا تقعد منظر . وتحقق دا فعلا . والزوج يختار يتنازل لها عن القيادة عشان يحافظ على الأولاد
.
الأم دي خسرت . انتصرت على جوزها . وخسرت كل حاجة
.
وأول خسارة هتخسرها هما عيالها نفسهم اللي ربتهم تربية مرة دول لما يكبروا ويرموها ورا ضهرهم
.
ما انتي منتظرة إيه من عيال اتربت في بيت سايقاه مرة حضرتك
.
الزوج اللي يتمطع ويقوم رامي يمين الطلاق عشان يعرف مراته إنه جامد وبيعرف يطلق
هوا انتصر . وخسر
.
أنا بقالي يومين عمال اتشتم عشان بوست عاكس بنتك
لو فكرت في الانتصار كنت رديت على كل واحد شتمني . واقدر اشتمهم شتايم تحتار ملائكة السيئات في حساب سيئاتها
عيب الشتايم دي الوحيد بالنسبة لي إنهم ممكن ما يفهموهاش
لكن . خليني فشيت غلي وشتمتهم . هل أنا كده هابقى كسبت ولا خسرت ؟!
.
فكر ألف مرة قبل ما تفكر في النصر والهزيمة . فكر في المكسب والخسارة
.
لو لقيت المكسب في الانتصار . إنتصر
ولو لقيت المكسب في الهزيمة . اتهزم باختيارك
.
سيدنا عمر رضي الله عنه فضل طول فترة خلافته رافض يعمل أسطول . مع إنه كان يقدر . لإنه كان خايف على المسلمين من الغرق
.
سيدنا عمر رضي الله عنه اختار مكان عاصمة مصر شرق النيل . عشان كان خايف على المسلمين يجيلهم الروم من الغرب . ويبقى النيل في ضهرهم
.
الرسول صلى الله عليه وسلم كان يقدر يقتل المنافقين . لكنه كان عامل حساب الناس اللي هتقول إنه بيقتل أصحابه
.
سماهم أصحابه . وهما منافقين . لإن الناس هتقول كده
.
ف النصر مش هدف . الهدف هو المكسب
.
بعض المعارك في خسرانها شرف . من عاد منهزما من مثلها انتصرا