ما هو تعريف النجاح ؟
تعريف النجاح هو #تحقيق_الهدف
بس كده خلاص
أيا كان الهدف اللي عاوز تحققه . طالما حققته . يبقى نجاح
يعني لو حرامي راح يسرق البنك . واتمسك . يبقى حرامي فاشل
ولو سرق البنك فعلا . يبقى حرامي ناجح.
طيب هل تحقيق الثروة هو النجاح ؟
تحقيق الثروة هو ( نجاح ). وليس ( هو النجاح ).
لو كان هدفك تحقيق ثروة . وحققتها . تبقى نجحت في هدفك الشخصي، عشان كده بقول إن تحقيق الثروة هو نجاح.
نجاح ليك انتا ياللي هدفك كان تحقيق الثروة.
لكنه ليس هو النجاح . يعني ليس هو المعيار بين الناس عشان نقول مين نجح ومين ما نجحش إننا نقيسهم بالفلوس.
طب ما المثل بيقول ( معاك جنيه . تسوى جنيه )
إيه رأيك في المثل ده ؟
المثل دا صحيح ( في سياق الثروة )
يعني لو احنا كلنا قاعدين في قعدة تجار. وبنقارن بين نفسنا.
فاللي معاه ١٠ مليون فينا أجدع من اللي معاه مليون، واللي معاه مليون أجدع من اللي معاه نصف مليون
لكن !!
خارج هذه الجلسة . لا تنطبق قاعدة معاك جنيه تسوى جنيه
يعني افرض إن اللي معاه نصف مليون دا معاه دكتوراه. واللي معاه ١٠ مليون معاه دبلون. ييجي الدكتور يقول للدبلون أنا أنجح منك.
نقول لهم أنجح منه في سياق إيه ؟!
في سياق التعليم . إنتا أنجح منه
لكن . إحنا قاعدين في قعدة تجار . بنقارن بين ثرواتهم . يبقى اللي معاه ١٠ مليون يفك ٢٠ منك يا ابو نصف مليون . حتى لو معاك اتنين دكتوراه وماجستير فوق البيعة
طيب . أنا عاوز تعريف النجاح المطلق
هنا بقى حضرتك هننتقل من تعريف النجاح . لتعريف الفلاح
النجاح المطلق هو تحقيق الهدف بردو
حاجة كده زي الجنيه المطلق . هوا جنيه بردو
إذن
ما هو تعريف الفلاح ؟
الفلاح هو تحقيق الهدف #الجيد
طب ما النجاح ممكن يكون في هدف جيد
أيوه عادي . لكن مين اللى قال إن الهدف دا جيد أصلا ؟!
فالفيصل هنا أساسا مش في تعريف الفلاح . ولكن في تعريف ما هو #معيار_الجودة
شوف حضرتك . أي معيار جودة هيحدده البشر . هو معيار غير مؤكد
لإن الجيد ليك . ممكن يكون سيء لغيرك
النافع ليك ممكن يكون ضار لغيرك
النافع ليك ولغيرك في بلدك . ممكن يكون ضار لناس في بلد تانية
النافع ليك ولغيرك في بلدك دلوقتي . ممكن يكون ضار لأحفادك
فاحنا محتاجين حد يكون مطلع على كل الأماكن . وكل الأزمان . وهوا يحدد لنا ما هو الجيد
وليس غير الله سبحانه وتعالى يمكن أن يحدد لنا معيار الجودة
إذن . فالفلاح هو تحقيق الأهداف التي وضعها لنا الله سبحانه وتعالى
والله سبحانه وتعالى خلقنا لهدف واحد ووحيد وأوحد . وهو #عبادته سبحانه وتعالى
قال تعالى: وما خلقت الجن والإنس إلا ليعبدون
طيب وعمارة الكون ؟!
عمارة الكون احنا بنعملها عشان احنا نعرف نعيش
لكن ربنا سبحانه وتعالى ما خلقناش عشان نعمر الكون
ما هو سبحانه وتعالى كان يقدر يعمر الكون بنفسه
يعني انتا متخيل إن ربنا سبحانه وتعالى ما كانش عارف يبني لنا كوبري . فخلقنا عشان نبني كوبري نعمر بيه الكون ؟!
ربنا سبحانه وتعالى ما كانش عارف يبني لنا عمارة . فخلقنا عشان نبنيها احنا ؟!
ربنا سبحانه وتعالى ما كانش قادر يخلق لنا سيارة . فخلقنا عشان نخلق السيارة ؟!
ربنا سبحانه وتعالى خلقنا لعبادته فقط . لكن باقي الأنشطة اللي احنا بنعملها لعمارة الكون . فهي لعمارة الكون لينا احنا . مش لربنا سبحانه وتعالى
الله سبحانه وتعالى لا يحتاج منا شيء
لاحظ الجمال في الجملة التي تلت قوله سبحانه وتعالى ( وما خلقت الجن والإنس إلا ليعبدون )
حيث قال تعالى بعدها مباشرة ( ما أريد منهم من رزق وما أريد أن يطعمون )
يعني انتا مخلوق عشان العبادة، بتزرع الأرض ( بتعمر الكون )
لمين ؟!
لربنا ؟!!
ربنا سبحانه وتعالى مش محتاج منك رزق . ولا محتاج إنك تطعمه
( ما أريد منهم من رزق وما أريد أن يطعمون )
إنتا مخلوق للعبادة . للعبادة فقط
وعمارة الكون بتعملها لنفسك . مش لربنا سبحانه وتعالى
تخيل . ولله المثل الأعلى . إنك جبت سباك يصلح لك الحوض . فالسباك ركب تاكسي عشان يجيلك
تخيل إن السباك فهم إن المطلوب منه هوا إنه يركب التاكسي ؟!!!
طب تخيل إن السباك وصل البيت . قال لك هات حسابي بقى . ما انا ركبت التاكسي خلاص
هوا انتا كنت بتركب التاكسي ليا ؟!
ولا انا جايبك عشان تركب تاكسي
ربنا سبحانه وتعالى خلقنا عشان نعبده
فاحنا اتمرقعنا، بس احنا ما نقدرش نعترف بمرقعتنا
فقلنا لا والله احنا مخلوقين لإعمار الكون . من دماغنا كده
ونروح نعمر الكون بقى عشان نجيب فلوس ونعيش بشوات
يا ولا . يا واد انتا يا بتاع الألالولو
يعني انتا كنت بتعمر الكون عشان الفلوس . ولا عشان ربنا ؟!!
طب عمر الكون عشان ربنا ومش هنعطيك فلوس دلوقتي وهتاخد مصنعيتك يوم القيامة
هههههههه
تعالى ارصف لي طريق يلا،
الإنسان كائن هجاص بطبعه
إذن، فالفلاح هو تحقيق الهدف الجيد
والهدف الجيد هو مراد الله سبحانه وتعالى
والفلاح دا له درجات . حسب امتداد نفعه
وهذه الدرجات هي /
الدرجة الأولى: #النجاة
زي ستي وستك اللي عاشوا عمرهم يصلوا فرضهم ويصوموا شهرهم وخلاص، دول نجوا . وفازوا
فمن زحزح عن النار وأدخل الجنة فقد فاز
لكن دول نفعهم اقتصر عليهم فقط.
الدرجة الثانية: #محاولة_النفع
قال رسول الله صلى الله عليه وسلم
( من استطاع أن ينفع أخاه فليفعل )
فمحاولة النفع معناها إنك بتفعل الخير لنفسك . فتنجو
لكنك بتحاول تنقل النفع للغير . ثم تفشل . يبقى جزاك الله خيرا
زي سيدنا الإمام الليث بن سعد رضي الله عنه
يقال أنه كان له علم كعلم سيدنا الإمام الشافعي رضي الله عنه . لكن تلامذته لم ينقلوا هذا العلم.
الدرجة الثالثة: #النفع
النفع هو إنك تفعل الخير لنفسك
وتنجح في نقل هذا النفع للغير
فيتحول الغير لناجين زي الدرجة الأولى
ناجين لنفسهم فقط.
الدرجة الرابعة: #التأثير
ودا إنك تحول الناس اللي بتنفعهم لنافعين للمجتمع
زي جمعية رسالة مثلا
بيقولوا لك خليك صالح في نفسك
لكن تعالى نخرج نصلح الشوارع أو نوصل المياه لقرية فقيرة أو أو
الدرجة الخامسة: #امتداد_الأثر
زي إنك تعمل كل اللي فات . لكن دا في زمنك فقط
امتداد الأثر بقى هو إن النفع دا يتواصل للأجيال التالية
وأعظم مثال على ذلك هو رسول الله صلى الله عليه وسلم
قال تعالى ( ورفعنا لك ذكرك )
فذكر الرسول صلى الله عليه وسلم سيظل موصولا للأبد مع استمرار انتفاع الناس به عليه الصلاة والسلام