من أسباب البلوكّات على الصفحة إنّي أكون باتكلّم عن الحالة العامّة لموضوع ما ف تقوم حضرتك كاتب تعليق بتتكلّم فيه عن الحالات الخاصّة للموضوع ده
إحنا بنأسّس لقواعد مش هنروش الناس بالحالات الخاصّة
لمّا يعرفوا الحالات العامّة الأوّل نبقى نتكلّم في الحالات الخاصّة
المشكلة الأكبر إنّ المتلقّي ما يعرفش نسب الحالات العامّة للخاصّة ف تعليقك بيوهمه إنّ الموضوع مقسوم لحالتين عكس بعض كده وخلاص
يعني
موضوع فيه 90 % من الحالات بتحصل بشكل معيّن
و 10 حالات كلّ حالة منهم حالة خاصّة
لو انا اتكلّمت عن الحالة العامة وحضرتك ذكرت حالة خاصّة ف كده المتلقّي هيتخيّل إنّ النسب 50 / 50
بينما هيّا في الحقيقة 90 / 1
متخيّل حضرتك عملت خلل قدّ إيه !!
ف ما بالك لو انتا ذكرت 9 حالات خاصّة
كده المتلقّي هيتعتبر الحالة العامّة دي نسبة حدوثها 10 % وهيّا أصلا 90 % !!
مش الشطارة إنّي أقدر أحصي للمتلقّي كلّ الحالات أنا ممكن كده أكون بضلّله وبتوّهه وبشتّته
خلّيه في الأوّل يعرف ال 90 % ويجرّب ويشوف ولمّا تقابله حالة خاصّة من كلّ 100 حالة وقتها نكلّمه في الحالة الخاصّة دي وقتها هيستوعبها وهيعرفها ( بحجمها الحقيقيّ )
أيّام ما كنت باعطي كورسات سوليدووركس كنت بلاقي المتدرّبين مهتمّين جدّا بأمر ما الأمر دا عمرهم ما هيستخدموه لكنّهم شافوا حدّ عامل فيديو بيرسم بيه جزء معقّد مثلا
كنت بقول لهم ما تهتمّوش بالأمر ده مش هتحتاجوه
بينما كنت بركّز معاهم على الأوامر اللي هيستخدموها أكتر حاجة في شغلهم حتّى لو كانت تقليديّة جدّا
ف الموضوع بنفس القياس في موضوعنا الحالي
ودا يرجع مرجوعه لأصلا إحنا بنعمل #إيه هنا !!
إحنا هنا ع الفيسبوك مش في مدرّج في كلّية السياسة والاقتصاد يعني
إحنا هنا بنكلّم عوامّ الناس مع احترامي يعني ف مش مجال إنّنا نتكلّم عن خواصّ الخواصّ
#طعام_الكبار_سمّ_الصغار
ودا بردو يرجع مرجوعه من زاوية تانية لإحنا بنعمل الإيه دا هنا #ليه ؟!
هل غرضنا نعلّم الناس
ولّا غرضنا نبان عارفين الحالات الخاصّة !!
ما نبقاش عاملين زيّ الدكتور اللي غاوي يتكلّم عن الأعراض الخاصّة جدّا للأمراض النادرة
بينما الناس يفيدهم أكتر لو تكلّمهم عن الأعراض العامّة للأمراض المنتشرة
وللأسف ثقافة الريلز رسّخت الطريقة دي
بتلاقي واحد طالع يكلّمك في 20 ثاينة عن تفصيلة دقيقة جدّا في البيع ف يبهرك ولا يا وله تحسّ إنّ دا برنس البيع في الشرق الأوسط
بينما مش هتلاقيه شارح في مكان ما على الفيسبوك أو اليوتيوب مفهوم عام جدّا زيّ ( قمع البيع ) مثلا بينما دا مفهوم عامّ جدّا وأساسيّ جدّا لأيّ حدّ فاتح كشك قهوة حتّى بسّ الكلام فيه هيبقى ركيك وتقليديّ ومكرّر ف مش هيجيب تفاعل
يعني إيه قمع البيع
يعني حضرتك عاوز مثلا 10 عملاء جداد كلّ شهر
ف هتبدأ بتجميع داتا ل 1000 عميل مستهدف بيبقى اسمهم leads
دول هتروح لهم بإعلان عامّ
الألف ليد دول منهم فقط 100 عميل محتمل يعني عملاء مناسبين ليك بشكل مبدئي دول إسمهم prospects
ال 100 بروسبيكت دول هيطلع منهم 10 عملاء نهائيّين دول اللي هينفذوا معاك همّا دول اللي انتا كنت مخطّط ليهم في الأوّل أصلا
ف لو انتا كنت مخطّط ل 20 يبقى هتبدأ القمع ب 2000 ليد
النسبة ما بين ال 10 اللي نفذوا وال 1000 اللي في أوّل القمع دي إسمها ( معامل التحويل ) في الحالة دي 1 %
مفهوم تاني بارد بردو مش هتلاقيه مشروح في ريل
مع إنّك المفروض تكون عارف معامل التحويل في مجالك كام عشان لو لقيت نفسك أقلّ من السوق من منافسينك يعني تفهم إنّ قمع البيع بتاعك مش متصمّم صحّ ف محتاج ترجع تشتغل عليه وتراجع رحلة العميل بتاعك أثناء الانتقال بين فلاتر القمع بتاعك هل انتا مصمّم أسئلة الفلترة بتاعتك صحّ هل ال 1000 اللي دخلوا في الأوّل أصلا كان معمول لهم استهداف صحّ ولّا لأ
كان عندي عامل في أحد الأماكن اللي اشتغلت فيها لقيت زمايله بيستهزؤوا بيه في مرّة
الولد ده كان عنده توكتوك وكان عاوز يعلّق بنات بالتوكتوك بتاعه
ف ركّب في التوكتوك كاسيت صوته عالي وراح وقف قدّام مدرسة بنات وشغّل أغاني وبتاع ههههههه
لكن ! ما فيش بنت التفتت له
أتاري الفالح راح وقف قدّام مدرسة بنات صمّ وبكم
دا خطأ في الاستهداف أصلا ههههههههه
ف مفاهيم زيّ الاستهداف وقمع البيع ومعامل التحويل إلخّ دي مفاهيم أساسيّة أهمّ بكتير جدّا من لو عملت لك ريل عن طريقة تسويق مطرقعة ومبهرة نجحت مع شركة إكس واي زدّ في جزر الكاريبي
ف أرجوكم مش المهمّ قدّ إيه بنقول معلومات قدّ ما المهمّ قدّ إيه من المعلومات دي مهمّ فعلا وقدّ إيه منها عمليّ وهيواجهك كلّ يوم في شغلك