عارف النكتة دي؟ واحد فاتح الفيس بوك لقى خبر عاجل: عربية ماشية عكس في طريق سريع ومبهدلة الدنيا.. شوية مراته اتصلت بيه وهي متنرفزة بتقول له الناس اتجننت.. العربيات كلها ماشية عكس النهارده..
لـ….
كنت أعرف سيدة محترمة ومتعلمة كل ما تشتكي من مضاعفات مرض ابنها المزمن فننصحها توديه للدكتور اللي متابع حالته تقول: ده دكتور حمـ/ـار.. بالنص كده.. كانت مشكلتها ان البروتوكول العلاجي بيسبب خمول ونوم كتير للولد.. وبعدين لما الأمر أصبح ما يتسكتش عليه راحت لدكتور تاني وقال لها على نفس البروتوكول العلاجي فرجعت وقالت: ده دكتور حمـ/ـار.. واتكرر الأمر ده مع دكتور تالت بعده.. والولد -الحمد لله على كل حال- فرصته في التعافي الكامل راحت..
لـ….
على مدار سنة حد كان بيبعت لي ياخد رأيي في الخطوة اللي جاية ويغيب ويرجع تاني وهكذا.. وكانت الخطوات كلها فيها تعامل مع الناس واتفاقات معاهم.. لكن كل مساعيه ما نجحتش.. بعد مرور السنة سألني بتردّد: هو العيب فيا؟ قلت له الصراحة أيوه.. وشرحت له مشاكله في التعامل مع الناس وازاي انه بيغلّب سوء الظن وازاي بياخد مواقف دفاعية بدري بدري بمجرد الشك في نية اللي قدامه (ودي حاجات ظهرت لي تدريجيا من حكاياته ليا).. وكانت نتيجة ده انه اتجه لتعديل السلوك..
لـ….
غالبا ممكن يكون ليك صديق أو حد معرفة شايف الناس كلها وحشة.. ممكن يكون حد اتجوز وطلق/اتطلق كتير وبيشتم في كل اللي كان معاهم دول.. ممكن يكون حد دخل شراكة كذا مرة وفي كل مرة باظت الشراكة وهو شايف انه اتظلم في كل مرة.. ممكن يكون حد اشتغل في كذا شركة وبيحكي لك ان زملاؤه في كل الشركات دي كانوا بيكرهوه عشان هم سيئين..
لـ….
النصيحة اللي حابب أوجهها لك (واللي اتعلمتها بالتجارب والمشاكل) هي: ما تتعاملش مع اللي تلاقي الناس كلها سيئين في روايته.. بغض النظر هو مظلوم بجد واللا لأ.. اههههرب ب ب ب ب ب.. ما تقولش: يا حرام ده شاف كتير في حياته.. أنا هاعوضه عن اللي شافه.. غالبا انت هتتضر وكمان هتضاف لطابور السيئين عنده وتيجي سيرتك ضمن الفضفضة المستقبلية اللي لا تنقطع.. أنا شفت حالات كتير كده غير اللي مريت بيه بنفسي..
لـ….
النصيحة الأهم هي انك تاخد بالك لا تطلع زي الناس اللي باحكي لك عليهم دول.. لو فيه إخفاق متكرر في اتجاه معين أرجوك اوعى تعيش دور الضحية وتستريح له وتتبسط لما تقعد تفضفض وتحكي وتصعب على الناس.. ده كسل وهروب.. ركز وراجع التفاصيل واستشير حد ولو اضطر الأمر انك تسأل الناس اللي حصلت بينك وبينهم مشاكل اعمل كده..
لـ….
مش شرط الناس تطلع سايقة عكس وبتهددك.. احتمال كبير تكون انت محتاج تتأكد انت سايق صح واللا لأ..