من حوالي أسبوعين كتبت بوست عن التحذير من إنّك تكون عاوز تعمل حاجة – لكنّك تتصرّف تصرّفات بتودّيك لنتيجة عكس اللي انتا عاوزها
زيّ إنّك يكون حلمك مثلا إنّ ابنك يكون عالم من علماء المسلمين – وبعدين تقوم مدخّله مدرسة لغات – المدرّسين فيها بيتكلّموا إنجليزي – أو ألمانيّ مكسّر
أو تكون عاوز بنتك تطلع بنت محتشمة – وتقوم مدخّلها فريق الباليه مثلا
تخيّل يا مؤمن خلال أسبوعين أحتاج اكتب بوست تاني عن نفس المشكلة !!
على رأي هشام الجخّ – #نجول_تاني
الفرق المرّة دي هوّا إنّي اخترعت للموضوع ده إسم
إسم اتولد بالصدفة بردو خلال استشارة مع عميل – كنت باشرح له الموضوع ده – ف قلت له ده ممكن نسمّيه ( التوجّه والتصرّف )
وسبب إعادة الكتابة في نفس الموضوع هو بردو العائلة الحنونة العطوفة اللي بتقدّم لي نصايح عن شركتي الجديدة
أنا توجّهي في الشركة هوّا إنّي عاوز أوسّع دايرة التوزيع – ف بفكّر اشتري عربيّة ربع نقل
بينما العائلة تروح وتيجي وتدور وترجع تقول لي ( ما تشتري تروسيكل – أصل سعره رخيص )
هنا إيه التوجّه ؟
التوجّه هو التوسّع
وإيه التصرّف ؟
التصرّف هو شراء تروسيكل آخره في الحركة 10 ولّا 20 كيلو
أنا توجّهي في الشركة زيادة المخزون وتكبير تشكيلة المنتجات اللي عندي
بينما العائلة تقول لي ( ما تسيب المخزن الصغيّر ده وتنقل الحاجة للبدروم عندنا تحت – تبقى وفّرت الإيجار )
هنا إيه التوجّه ؟
التوجّه هو زيادة المخزون
وإيه التصرّف
التصرّف هو النقل لمكان أصغر
طبعا هنيجي بعدين – بعد ما اسمع كلامهم – نلاقي التروسيكل مش بيتحرّك لمسافات بعيدة – والبدروم بقى مش مكفّي حاجة – تقوم العيلة تبصّ بعطف وحنان وتقول ألاه – تسدّق احنا غلطنا لمّا اشترينا التروسيكل – ولمّا نقلنا للبدروم
أسدّق آه – ما اسدّقش ليه يعني ؟!
لتكونوا فاكرين نفسكم عملتم أعجوبة يعنيّ – ولّا حاجة نادرة – دا 90 % من الشعب مقضّيها كده
مقضّيها توجّهات في ناحية – وتصرّفات في الناحية التانية – ثمّ اندهاشات بقى – وكلمات ( ألّاه ) كتير حدرتك
قلّبها في دماغك كده – هتلاقينا بنعتبر التصرّف ده مالوش لازمة – المهمّ التوجّه – وبعدين نرجع نشتكي بقى إنّه ليه الحياة ما عندهاش ذوق وما بتحقّقلناش أحلامنا – رغم إنّنا عاملين كلّ حاجة اهو – عاملين كلّ التوجّهات الجميلة
كلّنا توجّهاتنا نبقى أغنيا – بسّ مش عارف ليه الفلوس ما عندهاش ذوق كده وما بتستجيبش لتوجّهاتنا
وبالنسبة لتصرّفاتكم ؟!
لا ما تدخّلنيش في تفاصيل لو سمحت
عشان كده باتكلّم كتير عن فقر الفكر
ما هو موضوع التصرّفات اللي عكس التوجّهات دي هو علامة من علامات فقر الفكر
ممكن تلاقي واحد مقضّي يوم طول النهار بيحرق جاز في حتّة – وقافش وعطلان فيها – عشان يوفّر 100 جنيه مثلا
بينما هوّا في الحقيقة ضيّع يوم من عمره
غني الفكر بقى بيكون شايف إنّ اليوم ده أغلى بكتير من ال 100 جنيه – ف هتلاقيه تجاوز الموقف اللي هوّا فيه بسرعة ودفع 100 جنيه زيادة وكسب يومه
بالمناسبة الموقف ده حصل معايا بردو من فترة – عربيّة نقل واقفة قدّام الحاجة اللي هننقلها – والسوّاق عاوز 600 جنيه
بينما صديقي اللي كان معايا كان بيقترح نضيّع نصّ يوم عشان نجيب عربيّة هتاخد 400 جنيه
الميكانيكيّ بتاعي بيعمل نفس الموضوع
عشان يخدمني – بيجيب لي قطعة غيار مثلا ب 500 جنيه – هتبوظ كمان شهر
بينما هوّا قدّامه قطعة ب 700 جنيه – هتعيش 3 شهور
لأ هوّا عشان يوفّر لي 200 جنيه – ما عندوش مانع اعطل انا كلّ شهر مرّة
هوّا مش غرضه إنّه يكسب منّي كلّ شهر ولا حاجة – هوّا غرضه أمين فعلا وعاوز يوفّر لي – يوفّر لي 200 جنيه – ويعطّلني مرّة كلّ شهر عادي
وهوّا قريبي بردو بالمناسبة – ف شايف إنّه كده بيخدمني عشان قريبه بقى
وقول مهما تقول بقى – يهزّ دماغه – ويقول لك كلامك صحّ – وييجي عند التنفيذ – بردو عقله يسوقه في اللي هوّا متعوّد عليه !!
كام مرّة كنت عاوز تصحى بدري ( التوجّه ) – وتسهر ( التصرّف ) – وبعدين تقول ( ألّاه – أنا صحيت متأخّر ليه )
كام مرّة كنت عاوز تشتري جاكيت فخم مثلا – وبعدين رحت تدوّر في منطقة بيع ملابس شعبيّة – وبعدين تقول ألّاه – دا شكله السوق ما فيهوش شواكت حلوة ولّا إيه
أنا حصل معايا موقف كنت باسمعه قبل كده على سبيل النكتة – إنّ واحد محفظته ضاعت منّه في شارع ضلمة – ف راح يدوّر عليها في الشارع اللي بعديه عشان منوّر
أنا حصل معايا إنّ حدّ ضاعت منّه حاجة على جنب من جنبين الطريق – وراح يدوّر في الجنب التاني
بقول له بتعمل إيه – مش الحاجة ضاعت الناحية التانية – قال لي بسّ الناحية دي سالكة مش زحمة
لو حلفت لك إنّ دي مش نكتة – وإنّها حصلت معايا فعلا – مش هتصدّقني
موضوع ( التوجّه والتصرّف ) ده – لو ركّزت معاه – هتلاقيه سبب في 90 % من مشاكلنا
إنّنا بنبقى عاوزين نوصل لحاجة ( التوجّه ) – لكنّنا بنعمل مقدّمات تؤدّي لعكس هدفنا ( التصرّف )
اللي الفقراء مش مدركينه بقى – إنّ تصرّفاتهم المفروض مش تخلّيهم فقراء – دي المفروض تخلّيهم معدمين – لكن رحمة ربّنا سبحانه وتعالى بيهم مش بتوصّلهم للمرحلة دي