أيهما أفضل، التعلم من النظريات والشروحات التسلسلية
أم من دراسات الحالة . أو ال case studies
الأفضل هو دراسة النظريات بتسلسلها المستقر من صناع العلم محل الدراسة
ثم التطبيق عليها بدراسات الحالة
زمان كنت باشرح سوليدووركس
كانت شركات التدريب الكبيرة . خصوصا الأونلاين . تاخد الأوامر تشرحها أمر أمر بالتسلل بتاعهم
وكانت الشركة المنتجة للبرنامج عاملة دراسات حالة بتشرح من خلالها الأوامر بشكل مترابط وإن كان غير مرتب قوي
أنا كنت في الكورسات باعمل إيه ؟
كنت باشرح للمتدربين الأوامر بتسلسلها
وبعدين اطبق على ده بدراسة الحالة اللي في كتاب الشركة المنتجة للبرنامج
دراسات الحالة مثيرة . فبتكون أقرب في التقبل للمتدربين . لكنها هتفقدك الترتيب
وممكن تفقدك أمر أصلا
وممكن تحسسك بأهمية أو عدم أهمية أمر على غير الحقيقة . لإن الحالة محل الدراسة باين فيها قوي الأمر غير المهم . ومش باين فيها الأمر المهم
فانتبه من إنك تتعلم من دراسات الحالة فقط بدون الارتكاز على الأساس العلمي للموضوع
الموضوع متكرر في البيزنس طبعا
تلاقي حد بيقول المفروض في الحالة الفلانية نعمل كذا
تقول له ليه
يقول لك حصلت حالة مشابهة مع شركة كذا واتصرفوا كده
أيوه انتا هنا أهملت فرق حجم الشركتين وطبيعة عملهم ونوع منتجهم ودولتهم والمستوى الاقتصادى لشعوبهم و و و
أغفلت حتى المرحلة الزمنية اللي حصلت فيها الحالة اللي بتبني عليها
المفروض تقول لي المفروض نعمل كذا لإن ده مرده في البيزنس لنظرية كذا أو قاعدة كذا
وتدعم ذلك بحالات مشابهة حصلت في شركات أخرى . وحبذا لو تكون الشركة في مجال مقارب
فيه إجابات صح جدا في مجال . وغلط جدا في مجال تاني
تقديم الخدمات مثلا مختلف عن تقديم المنتجات
نفس المواصفة لشعب ممكن تكون سيئة لشعب تاني
بل إن ممكن جوا دولة واحدة المنتج تختلف مواصفاته من مدينة للتانية
أنا عمري ما شفت التكييف الصحراوي إلا في أسوان مثلا . أول مرة يعني
هوا منتشر هناك جدا . لكنه مش هيكون مفضل في المحلة مثلا حيث الرطوبة عالية
بينما المحلة مناسبة لصناعة النسيج . لإن بردو الرطوبة عالية
فالاستناد لدراسات الحالة لوحدها كده فقط غلط طبعا
دراسات الحالة ممكن نستخدمها ل #تدعيم وجهة نظرنا . لكن . مش ل #بناء معلومتنا
في سياق مشابه يقولون . لا يفتي مقلد لمقلد
يعني ما ينفعش تتعب فتروح للدكتور فيعطيك روشتة . فييجي أخوك يتعب نفس التعب تقوم عاطي له روشتتك وتقول له خد دي !!
ممكن أخوك عنده الضغط . السكر . ممكن أختك حامل . بترضع
ما ينفعش شيخ يفتي لحد برخصة . تقوم انتا واخد نفس الفتوى لنفسك !!
اللي خد الفتوى الأولى مقلد
والتاني مقلد
يبقى التاني يروح يسأل الشيخ تاني
لإن الأولاني مش فاهم الشيخ أفتى له بناءا على إيه
ممكن الست الأولى عجوزة فالشيخ يفتي لها بالتخفف من الثياب
فتفتي هيا لبنتها بنفس الفتوى !!
ممكن الأول على سفر وانتا مقيم
موضوع الروشتة والفتوى ده هيحصل لك لو بنيت معلوماتك على دراسات الحالات فقط
دراسات الحالة هتخليك #مثقف في المجال
ودي شتيمة للمشتغل في مجال
تخيل طباخ مثلا قلت عنه إنه مثقف في الأكل
إنتا كده بتشتمه
إحنا عاوزين ناس ما بين #متعلم و #عالم
والاتنين دول لازم يكون عندهم #منهح
منهج للمتعلم يمشي عليه
ومنهج يضعه العالم
لكن مش عاوزين مثقفين في مجالات تخصصية
المثقف لديه قطع متفرقة من أقمشة متنوعة عمل منها ثوب مرقع
لكن العالم عنده ثوب متناسق نظيف لا ثقوب فيه