سمعت زمان من حدّ كنت بتابعه تعبير ( بيزنس دمّه خفيف ) !
وبعدين سمعتها قريّب من حدّ تاني !!
وأنا شخصيّا عندي نفس المفهوم !!!
ف تعالى في البوست ده أشرح لحضرتك تصوّري عن معنى الكلمة دي – بيزنس دمّه خفيف
اليزنس اللي دمّه خفيف هو
#أوّلا /
البيزنس اللي تعمله في حاجة بتفهم فيها – ف تعفي نفسك من الحيرة والتشتّت والخوف من المجهول
تعفي نفسك من البحث عن إجابات أسئلة – بينما الزبون واقف ع الباب منتظر ياخد المنتج – وانتا جوّا محتاس مش عارف تجيب له إيه
دا عكس خفّة الدمّ – القلق والتوتّر دول عكس خفّة الدمّ
#ثانيا /
البيزنس اللي تعمله على قدّ فلوسك – ف تعفي نفسك من توتّر إنّك تكون واخد فلوس من حدّ – أو مشارك حدّ دمّه تقيل على قلبك – وكلّ شويّة يقول لك هيه – المعزة باضت ولّا ولدت – وجابت دكر ولّا نتاية
تعفي نفسك من حرمة الربا – وقلق الديون – دي خفّة الدمّ في البيزنس
#ثالثا /
البيزنس ابو دمّ خفيف هوّا اللي كلّ بضاعتك فيه شاريها نقدا – ما فيش عليك أواجل لحدّ واخد منّه بضاعة ومش عارف هتتباع ولّا مش هتتباع – وآخر الشهر هيطالبك بتمنها – هتجيبه منين
إنتا شغّال باللي معاك – بتشتري بضاعة على قدّك – وتبيع منها على قدّك – وآخر اليوم بتقفل الدكّان وتروح تنام ومش شاغل بالك بمطالبات آخر الشهر
#رابعا /
البيزنس ابو دمّ خفيف هوّا اللي بتعتذر فيه عن بيع حاجات أكبر من طاقتك – بدل ما تحشر نفسك بين مورّد مش معاك فلوس تعطيها له – وعميل عاوز بضاعة مش معاك فلوس تشتريها – ومموّل هيعطيك فلوس ومنتظر ربحها – ف بتخرج من المدعكة دي وتقول آسف – دا أكبر من طاقتي
اليومين اللي فاتوا – جالي حوالي 5 طلبات استيراد ستريتش لأوروبّا – ودا مش طبيعيّ – غالبا البلاستيك عندهم سعره طاير بردو – ف دوّروا في دفاترهم القديمة وقالوا نستورد من مصر
وكان الردّ – آسف – ما اقدرش أصدّر دلوقتي
عارف حضرتك المطلوب كام – حوالي 100 طنّ ستريتش – سعرهم دلوقتي حوالي 10 مليون جنيه – ومكسبهم حوالي 2 مليون جنيه مثلا
طاب ما تشوف حدّ تاخد منّه مش عارف إيه – ومصنع يعطيك مش عارف إيه على ضمانة مش عارف إيه – دول اتنين مليون جنيه – مش بنلاقيهم كلّ يوم
لا يا فندم – أنا شغّال بدمّ خفيف
السنة الجايّة إن شاء الله أبقى اعمل الموضوع ده – لكن دلوقتي أنا عاوز ابيع 50 كيلو و 100 كيلو كاش وعدّا ونقدا – وبادفع فلوس الخام للمصنع مقدّم – مش بسّ كاش – وقاعد باشا ما حدّش له عندي جنيه
اللي يمشي على قدّه – ما حدّش قدّه
#خامسا /
البيزنس اللي دمّه خفيف هوّا البيزنس – على حدّ تعبير أصدقائي – البيزنس اللي ( على وشّ السوق )
يعني إيه على وشّ السوق ؟
يعني – باشتري بصلة من حسن بجنيه – ببيعها لحسنين بجنيه وقرش – على وشّ السوق
حسن في الشارع اللي ورانا – وحسنين في الشارع اللي قدّامنا – وخلصت على كده
لا بفكّر استورد عشان اوفّر مش عارف ربع جنه في البصلة – مش وقته دلوقتي
ولا بفكّر ابيع لحسنين آجل عشان اكسب ربع جنيه تاني في البصلة
أنا شغّال على وشّ السوق
على رأي المثل – إشتري بجنيه وبيع بجنيه والمكسب بينهم
في زيارة لمطحن – عرفت معلومة إنّك أحسن لك تشتري القمح من مورّد محلّيّ في مصر – أحسن ما تشتريه جملة من أوكرانيا ولّا روسيا
إزّاي يا فندم ؟
قال لي – لو هتشتريه من روسيا – هيتقال لك مثلا الطنّ بألف دولار – لإنّك بتاخد كمّيّة قليّلة
بينما – التاجر المحلّيّ – بيروح يشتريه من روسيا بكمّيات ضخمة ب 700 دولار – بيصرف عليه 100 دولار – وبيبيعهولك هنا مثلا ب 900 دولار !!
يبقى هوّا كسبان 100 دولار – وانتا موفّر 100 دولار – وموفّر وجع قلبك بقى مع الشحن و و و
في استشارة لعميل شغّال في منتجات استيراد بردو – قال لي – أنا ببيع واشتري من مستورد هنا ما قيمته كونتينر مثلا – على 3 أو 4 مرّات – في 3 أو 4 شهور – بدوّر فلوسي فيهم بسرعة – ومكسبي مضمون – ومريّح نفسي من قلق الاستيراد
بينما – حدّ تاني – بيقعد يهري الشهرين تلاتة دول في استيراد نفس البضاعة – ويبيعها مرّة واحدة – ويحقّق نفس مكسبي من ال 4 دورات – بسّ بقلق وتوتّر – وتجميد فلوس لمدّة 4 شهور
وممكن الشغل اللي انا بعته بدري ده يكون هوّا اللي خد وشّ السوق – على ما زميلي ده يجيب البضاعة تكون موضتها بطلت ! ويلبس هوّا الكونتينر !!
طبعا مش بقول لك ما تكبرش – ومش بقول لك ما تستوردش – ومش بقول لك لو تقدر تكون تايكون ما تعملش كده
لكن – لو أعصابك وحجمك وفلوسك ما تجيبش ده – يبقى ما تحرقش دمّك وأعصابك – واشتغل بدمّ خفيف
#سادسا /
البيزنس ابو دمّ خفيف – هوّا البيزنس الواضح
دا عيب منتجي – ودا سعره – معلن على النتّ – ودا عنوان شركتنا – ودا رقم السجلّ التجاريّ بتاعنا وبطاقتنا الضريبيّة – ودا ودا ودا
لكن – البيزنس أبو دمّ تقيل – هوّا اللي بتعيش فيه دور المفتّش كرومبو – وقاعد تحقّق وتدقّق في كلّ زبون داخل لك تشوف جاي يسرقك منين ولّا يغتالك ازّاي
عاوز تعمل له كشف هيئة قبل ما تقول له على سعر – ويكإنّه سيّء النيّة إلى أن يثبت العكس
قاعد تفكّر وتحنكش إزّاي تداري العيب على الزبون عشان تبلفه بالأونطة وتأكّله البالوظة – وبعدين تقعد تضحك مع الصبيّ بتاعك على ازّاي قرطستوا الزبون الكروديا ده وبعتوله البضاعة المغشوشة – ويكإنّكوا عملتوا إنجاز يعني – مش ويكإنّكوا غشّيتوا ومن غشّنا فليس منّا
وبعدين ترجعوا تشتكوا إلّا مش عارف الزباين الأندال ما عادوش بييجوا ليه – ألّا سحيح اجدعان – سدق المثل – خيرن تعمل – شرق الدلتا
#سابعا /
البيزنس ابو دمّ خفيف -هوّا اللي تكلّم فيه المنافس تقول له – خلّي بالك – فيه معرض الشهر الجاي – تيجي معايا في عربيتي بدل ما نروح كلّ واحد في عربيّة
أنا بجيب كونتينر كذا – أعمل حسابك معايا في حاجة
البزنس ابو دمّ خفيف – هوّا اللي لمّا حدّ يسألك عن معلومة فنّيّة فيه – تقولها ببساطة وبأريحيّة – مش قاعد قافل على المعلومات ويكإنّها لو اتعرفت رزقك هيقف
لكن – البيزنس ابو دمّ تقيل – هوّا اللي انتا عايش فيه حرب وهميّة مع طواحين الهواء
أوّل ما عملت الشركة وضفنا قسم الغذائيّ – حدّ كلّمني عاوز يشتري منّي بضاعة – وعرفت إنّه منافس في البلد عندنا
ف حماتي بقت تتشال وتتهبد – إبن باتعة العمشة عاوز يكشف سررررركوا
ما يكشف سرّنا يا حماتي – هوّا احنا بنخصّب بلوتونيوم
ما ييجي يشرّفنا ويشتري اللي هوّا عاوزه
حماتي واخدة معلوماتها عن البيزنس من مسلسل عبد الغفور البرعيّ طبعا – لكن دا مش حقيقيّ – ما اللي عاوز يعطيني فلوس ينوّرنا – مش هيعطيني فلوس ؟ ولّا هيشتري ويجري يعني ولّا إيه – اللي عاوز يعطيني فلوس ييجي يا جماعة عادي – مش هحقّق هوّا نيّته إيه
#ثامنا /
البيزنس ابو دمّ خفيف – اللي عندك ميعاد فيه بتقفل الدكّان – وتفصل منّه
اللي ما بتاخدوش معاك للبيت
اللي ما بيحرمش زوجتك وأولادك من فسحة كلّ أسبوع
#تاسعا /
البيزنس ابو دمّ خفيف – هوّا اللي تعرف تعدّ فيه غنمك
أنا شغّال في 1 2 3 – بمواصفات 1 2 3 – بسّ
بينما – البيزنس ابو دمّ تقيل – هوّا اللي تكون شغّال فيه في 500 صنف – لدرجة إنّك ممكن تنسى مواصفات وأسعار بنود عندك !!
#عاشرا /
البيزنس ابو دمّ خفيف – هوّا اللي طول الوقت بتنضّف نفسك منّه
صنف راكد – بيعه بخسارة
صنف ما عادش بيتطلب – ما عدتش تشتريه
دخلت أماكن عندهم رواكد من سنين – وسايبينها على حالها كده – تحسّ إنّها من ريحة المرحوم !!
إشترينا أصناف غذائيّ للبيع في رمضان – واتبقّى منها جزء
كلّمت المصنع بعد رمضان – أنا عاوز ارجّع لكوا الكمّيّة الفلانيّة
قال لك هترجع على سعر الفاتورة – اللي هوّا أرخص بكتير من دلوقتي
طيّب – ماشي – أنا موافق اخسر – بسّ امسك السيولة
ف زميلي قال لي – يا هندسة – البضاعة أحسن من الفلوس
ف قلت له لااااا – حاشا وماشا – البضاعة ((((( اللي دايرة ))))) هيّا اللي أحسن من الفلوس
لكن – الفلوس أحسن من البضاعة الراكدة
بسّ هنخسر
ولو
خسارة قريّبة ولا مكسب بعيد – اللي هاخسره النهارده هعوّضه في البضاعة الجديدة الدايرة إن شاء الله
ما تسيبهم يا هندسة ونبيعهم في رمضان الجاي
لأ
من هنا لرمضان الجاي تمن البضاعة دا يكون جاب من دورانه مكسب أكبر بكتير من اللي هنكسبه السنة الجايّة – أنا مش بتاع عقارات ولا دهب
حتّى بتوع العقارات والدهب لو فكّروا يخللوا البضاعة جنبهم هيخسروا
التجارة هي التدويييييييييير
الوحيد اللي يكسب من بقاء البضاعة عنده فترة أطول – هو تاجر الآثار
وحتّى تاجر الآثار لو دوّر البضاعة هيكون أكسب له
تدوّر بضاعتك – وتجرد بشكل دوريّ – وتنضّف نفسك
#حادي_عشر /
البيزنس ابو دمّ خفيف – هوّا اللي عندك فيه موارد على قدّه
محتاج محلّ 50 متر – ما تاخدش محلّ 200 متر
محتاج محلّ في شارع جانبيّ – ما تاخدش محلّ ع الناصية
محتاج محلّ في عين شمس – ما تاخدش محلّ في التجمّع الخامس
تقدر تعمل معرض موبيليا داخل مصنعك – ما تأجّرش معرض ب 100 ألف جنيه في الشهر
محتاج اتنين عمّال – ما توظّفش كتيبة وترجع تشتكي إنّهم مش بيشتغلوا – وراح فين الدمير وبتاع
بتنقل مرّة في الأسبوع – ما تشتريش عربيّة نقل – لأ وتعيّن لها سوّاق وتلحقه على الكتيبة
يكفيك مصنع إيجار – ما تروحش ترمي نصّ فلوسك في حتّة أرض – والنصّ التاني في مباني – وترجع تقول لي تسدّق ما عنديش سيولة – أسدّق آه – دانا كلّ يوم بسدّق الحكاية دي
#ثاني_عشر /
البيزنس ابو دمّ خفيف – اللي عندك فيه حسابات وتسجيلات وقيود
لو سألتك دلوقتي مخزنك فيه بضاعة بكام – تكون عارف – بعت بكام الشهر ده – تكون عارف
لكن – تقعد تايه – هيجيلك الصداع من كلّ حتّة – ويبقى البيزنس دمّه تقيل – وتبقى كاره تروح شغلك
أبوها حساب
واللي يحسب الحسابات – في الهنا يبات
هوّن على نفسك – وامشي على قدّك – واعتبر شغلك ببساطة – شغل !!
معظم الناس ما بتعتبرش شغلها شغل – للأسف
تلاقيه سايبه يهبّل كده براحته – ويشتكي بردو
واعتبر شغلك ببساطة – شغل
مجرّد شغل – ما هوّاش حرب
تلاقيه فاتح على نفسه فواتيح – وبيشتكي من التشتّت والتوتّر – ما انتا اللي مشتّت نفسك وموتّر نفسك
اشتغل بدمّ خفيف – وطولها زيّ عرضها