في ظل نمط الحياة المعاصرة وخصوصاً بعد انتشار السوشال ميديا الانسان العادي اللي معندوش موهبة جامدة ولا مشهور وعنده متابعين بيبقى عنده احساس بالتقصير والاحباط وان الناس كلها سبقاه واحسن منه مع ان ده غير صحيح
مينفعش اصلاً كل الناس تبقى مشهورة ولا عندها مواهب فذة .. لو كل الناس عندها مواهب الموهبة هتفقد قيمتها اللي جاية أصلاً من ندرتها ..الطبيعي في اغلب الناس انهم مش كده .. ده مش حاجة مطلوبة منك في الحياة ولا هو معيار للنجاح .. المواهب ممكن تستخدم في الخير او الشر والشهرة ليها عيوب كتير زي ما ليها بريق ولمعان ..ومش معنى ان انسان مشهور انه كده يعتبر ناجح ..ولا انه عايش حياته في سعادة وانسجام
مش مطلوب منك في الحياة غير انك تكون انسان صالح .. متسرقش متظلمش متاكلش قرش حرام متقعش في حاجة من الكبائر متقتلش متزنيش متاكلش مال يتيم …الخ .. يعني يكون مجموع حسناتك واعمالك الصالحة اعلى من سيئاتك ومعاصيك .. في نفس الوقت تعيش عيشة كريمة وهادية تكون مريحة وجميلة بمعاييرك انت الشخصية مش المعايير اللي بيحطها ناس تانية في ظروف وطباع مختلفة عن ظروفك ..
هو ده الهدف بتاعك في الحياة ..عملته ونجحت فيه يبقى انت كده انسان ناجح وكويس وزي الفل ..لقيت نفسك بتعمل العكس يبقى محتاج تقف مع نفسك وتشوف الغلط اللي بتعمله وتصلحه في هدوء ..
متشغلش بالك بالمقارنات وإلا هتنغص عليك حياتك وهتخليك مش عارف تستمتع بالكتير اللي متاح قدامك واللي انجزته وهتحس دايما إنك مقصر وبتجري في سباق مش عاوز يخلص .. كل ما توصل لحاجة تجري على اللي بعدها من غير حتى ما تستمتع ولا تحتفل باللي انت وصلتله ..او بتوصل لحاجات مش هي اللي انت عاوزها ولا كان ليها أولوية بالنسبالك بس عشان بقت تريند فروحت جريت وراها