كتبت بوست عن مغالطة الاحتكام للنتيجة – واستشهدت فيه بموقف بائع البرتقال – عمّ ربيع
اللي فعله كان توصيفه ( إضاعة مال ) – بينما كانت نتيجته هي ( الحفاوة من الناس )
وبعدها كتبت بوست تاني انتشر بشكل كبير – فطبعا الناس اللي داخلة من البوست التاني بتاخد جولة في الصفحة – فخبطوا في بوست عمّ ربيع – وهاتك يا هبد بقى
بين ناس تقول إنّه صدق الله فصدقه الله – كبّرتوا الموضوع يا شباب
واللي يقول إنّ نيّته كانت خير – ما اعرفش عرفوا نيّته منين – جابوها من الكونترول يعني
واللي يقول إنّ التعامل مع ربّنا سبحانه وتعالى مالوش حسابات – دا بيكون سبهللة كده
الحقيقة إنّ مش هيّا دي المشكلة – المشكلة أعمق من كده بكتير
المشكلة دي أنا بوصّفها بمصطلح بسمّيه ( الإله المصنوع )
الكفّار زمان كانوا عارفين إنّه فيه إله – لكن الإله ده هيلزمنا بحاجات – ويمنعنا عن الشهوات المحرّمة
فاخترعوا فكرة الصنم
وده عبارة عن حاجة كده هنعملها إله – بسّ الحاجة دي لا بتشيل ولا بتحطّ – ولا هتؤمرنا بحاجة – ولا هتمنعنا عن شهواتنا
فنبقى – من جهة – بقينا محترمين بإنّنا مش عايشين كده من غير إله – لا طبعا – إحنا شعب متديّن بطبعه
ومن الناحية التانية بنعمل اللي على مزاجنا
خطّة في منتهى الذكاء
جاء الإسلام – وجاء الرسول صلّى الله عليه وسلّم – فأخبرنا عن الله سبحانه وتعالى بما أخبره به الله سبحانه وتعالى عن نفسه
فاحنا – كبشر – اتظبطنا شويّة
وبعدين بدأنا نزمزق – دي أوامر ربّنا دي سبحانه وتعالى صعبة علينا
وفيه شهوات عاوزين نلغوص فيها – بسّ ربّنا سبحانه وتعالى نهانا عنها
نعمل إيه ؟!
نعمل صنم ؟!
ما يصحّش – دي كانت الناس تاكل وشّنا
بسّ – وجدتها !!
إحنا هنسيب النظام على ما هو عليه – واحنا متديّنين بطبعنا بردو وكلّ حاجة – وبشوات ولاد بشوات
بسّ – هنعمل نسخة تقليد كده – وهنسمّيها ربّنا بردو – وهنوصفه احنا بمزاجنا
هنوصفه مثلا بإنّه رحيم – بسّ – لكن هنشيل منّه صفة إنّه شديد العقاب مثلا – دي مش كيوت
وحتّى وصف الرحمة ده – إحنا اللي هنحدّده – إحنا اللي هنقول إيه هيّا رحمة ربّنا
وربّنا بتاعنا بيرحم كلّ الناس – كووووول الناس
بسّ ربّنا سبحانه وتعالى حدّد رحمته هيكتبها لمين – قال تعالى ( فسأكتبها للّذين يتّقون )
لا – دا ربّنا بتاعكم انتوا اللي قال كده – لكن ربّنا بتاعنا احنا بيرحم كلّ الناس
هنوصفه إنّه بيكافيء على النوايا – بسّ – من غير ما نعمل حاجة
إنتا بسّ تقوم من النوم كده تنوي تعمل خير إن شاء الله – وبعد كده عربد طول النهار براحتك
هنوصفه إنّه غفور
إنتا تلطّش في الدنيا زيّ ما انتا عاوز – وهوّا كده كده هيغفر لك
لو عملت أيّ ذنب – وعاوز تتوب – براحتك – حتّى من غير ما ترجّع الحقوق لأصحابها – عادي – عندنا فيه عرض كومبو شغّال بيقول كده
ربّنا بتاعنا كلّ حاجة عنده عادي
لو عاوز تكفر بيه حتّى – عادي – دا بيغفر كووووول حاجة – وهتدخل الجنّة عادي – إبسط يا عمّ – كازيون يا اخواننااااا
بسّ هوّا سبحانه وتعالى قال عن نفسه إنّ فيه حاجات لا يغفرها – قال تعالى ( إنّ الله لا يغفر أن يشرك به )
لا – دا ربّنا بتاعكوا اللي قال كده – لكن ربّنا بتاعنا بيغفر كلّ حاجة
ربّنا سبحانه وتعالى أخبرنا عنه رسوله الكريم صلّى الله عليه وسلّم أنّه يكره إضاعة المال
قال رسول الله صلّى الله عليه وسلّم – إنّ الله كره لكم قيل وقال وكثرة السؤال وإضاعة المال
لا بسّ عندنا احنا انتا تضيّع المال عادي – وهتاخد ثواب عادي بردو – حتّى لو عملت حاجة بيكرهها ربّنا سبحانه وتعالى – دا ربّنا بتاعكوا هوّا اللي بيكرهها – مش ربّنا بتاعنا
وتقول لي عمّ ربيع – الموضوع كبير يا مولانا