دي حالة للأسف واقع فيها أصحاب مصانع كتير . أو حتى شركات بشكل عام . مش المصانع فقط يعني
صاحب مصنع مثلا بيكسب ١٠٠ ألف جنيه في الشهر
لكنه !!
#أولا /
صاحب المصنع ده عنده مصنع ملك . ف مش خاصم تكلفة ايجار المصنع ده
يخصمهم ليه . هوا ما بيدفعش إيجار !!
لا يا فندم . يخصمهم
هوا مش المفروض كان يأجر المصنع ده للغير ويكسب إيجاره
ف لما هوا اشتغل فيه بنفسه . حرم نفسه من مكسب الإيجار ده . ف لازم يتخصم من أرباحه
#ثانيا /
صاحب المصنع بيديره بنفسه . ف مش خاصم من أرباحه مرتبه الشخصي
وهوا المفروض ياخد مرتب ؟!
أيوه
عشان في يوم من الأيام لو عين مدير . يعطيه الراتب بتاعه . ف يتبقى له الربح الحقيقي بعد خصم الراتب
#ثالثا /
صاحب المصنع مش بيخصم إهلاكات المكن
يعني مثلا عنده مكن ب ٦ مليون جنيه
لو هنهلكهم على ١٠ سنين
يبقى ٦٠٠ ألف في السنة
يعني ٥٠ ألف في الشهر
ف حضرتك بتكسب كل شهر ١٠٠ ألف
لكن قيمة مكنك بتنزل ٥٠ ألف كل شهر !!
ف إنتا بتاكل من اللحم الحي !!
يعني زيك زي التاجر اللي باع بضاعة وما جابش بديل ليها . وحسب سعر بيع البضاعة دي من الربح !!
لا حضرتك . حضرتك تبيع . وتشتري تاني . واللي يتبقى لك ده هو الربح . وإلا تبقى بتاكل من اللحم الحي
يعني تخيل سواق تاكسي كسب ٥٠٠ جنيه النهارده
لكنه تغافل عن إنه كان طالع الصبح مفول التانك بنزين . وآخر النهار ما فولش بنزين تاني
ف بكره الصبح هتدفع ٣٠٠ جنيه بنزين
يعنى انتا كسبت النهارده ٢٠٠ جنيه فقط . ولا ال ٥٠٠ كلهم ؟!
هتاكل من اللحم الحي ؟!
#رابعا /
صاحب المصنع مش عامل تأمينات للعمال مثلا
ف هوا حاسب إنه دافع مرتبات ١٠٠ ألف مثلا
بينما الحقيقة هوا كان المفروض يدفع ٢٠ ألف جنيه زيادة للتأمينات
يعني ربحه المفروض يتخصم منه ٢٠ ألف كمان
أو
حالتنا اللي سأل عنها صاحب التعليق
يعنى انتا بتدفع مرتبات ١٠٠ ألف جنيه
إنتا أصلا بتخصم منهم خصومات تعسفية ٢٠ ألف جنيه
ف الحقيقة إن المبلغ ده ما كانش المفروض يدخل جيبك ك ربح
#خامسا /
صاحب المصنع عامل تقييم وهمي للضرائب . على أساسه بيدفع ضرائب في السنة مثلا ١٢٠ ألف . يعني ١٠ آلاف جنيه في الشهر . بينما الحقيقة المفروض يدفع ٢٤٠ ألف في السنة . يعني ٢٠ ألف في الشهر
يعني فيه ١٠ آلاف جنيه شهريا بيدخلوا جيبه ك ربح . بينما هوا لو عمل حسابات ضرايب مظبوطة المفروض المبلغ ده يخسره
ف . ممكن ال ١٠٠ ألف ربح كلهم . يطلعوا أرباح وهمية !!
ممكن حضرتك تكون شايف دا كلام يعني فاضل زيادة عن اللزوم
لا خالص حضرتك
عاوز تعرف تأثيره . تخيل إنك هتدخل شريك معاك
في بداية الكلام . إنتا قلت للشريك دا انا باكسب ١٠٠ ألف في الشهر
لو حطيت راس مال قد اللي معايا . هتكسب انتا كمان ١٠٠ ألف . بدون تفاصيل يعني لتسهيل الحسابات فقط
هنا بقى هتكتشف إني مشغل المشروع في مصنعي الملك . مش المفروض دا يتخصم له إيجار
يعني احنا الحقيقة يا فندم بنكسب ٨٠ ألف في الشهر . مش ١٠٠
وأنا اللي بدير . شريكي مش بيدير . مش المفروض يطلع لي مرتب
أو هنتنحى إحنا الاتنين ونجيب مدير . المدير ده هياخد مرتب . هيتخصم من الربح !
ف ال ٨٠ ألف حقيقتهم أصلا ٦٠ ألف بس
هتيجي تقول المكن في الشركة هاحسبه بس ٦ مليون . شريكك هيقول لك لأ . تعالى نحسب الإهلاك . إيه ده . المكن ده يسوى ٣ مليون فقط
ف تلاقي شريكك بيحط ٣ مليون فقط مقابل المكن . مش ٦ !! . ومطلوب منك تعطيه ربح ال ١٠٠ ألف بردو !!
حبيتوا تصدروا مثلا . تيجي تظبط ورقك . تطلع لك حسابات التأمينات . تقوم خاصمها من أرباح الشركة
أو قررتوا تدخلوا البورصة . ف ورقكوا لازم يتظبط . لازم زي ما بنقول بالتعبير الدارج . لازم ( تقلع ملط ) قدام الحكومة . في الحسابات يعني
تيجي تقدم كشوفات حسابات حقيقية . يعني ضرائب حقيقية . تلاقي نفسك خسران جزء تاني للضرايب
وقتها بقى هتلاقي شريكك هوا اللي قلع لك ملط
كنت قايل لي كل واحد هيكسب ١٠٠ ألف . دا احنا وزعناهم ع الحبايب
شريكك هيقول لك إنتا خدعتني . بعت لي وهم
بس المشكلة الأكبر مش وقتها . المشكلة الأكبر هي دلوقتي . إنك بتبيع الوهم لنفسك شخصيا !!
وقتها هكتشف إنك كنت بتخدع نفسك . وإن الأرباح اللي كنت بتحققها كانت أرباح وهمية
بس كلامك ده لو كل حد طبقه على شغله . هيطلع ما حدش بيكسب
طاب ما دا شيء كويس
إنك تعرف إنك مخدوع وإني أحاول أفوقك ما دا كويس ليك ومن مصلحتك
ساعتها تشوف ممكن تقفل المشروع ده وتفتح مشروع تاني بيحقق ربح ( حقيقي )
أو تجتهد وتفحر في مشروعك تشوف ازاي تخليه يعمل ربح حقيقي بعد تغطية كل المصاريف دي
معرفة الحقيقة مستحيل تكون ضارة
ممكن تكون صادمة . محزنة . لكنها بالتأكيد مفيدة
أخيرا
شوف حلقة ( مكاسب خسرانة )
من سلسلة مفاهيم مهمة في البيزنس على قناة المكتب
شارح هناك ييجي ٣٠ حالة زي المذكورين في البوست هنا