معظم أسئلتك هتلاقي إجاباتها – وإجاباتها القاطعة – لو جاوبت انتا الأوّل على سؤال #إنتا_عاوز_إيه !!
يعني – مثلا – السؤال اللي اتحول دلوقتي لمسألة جدليّة – وهو سؤال ( يا ترى فيه فعلا توازن بين العمل والحياة – ولّا دي أسطورة )
السؤال دا عمره ما كان مهمّ – لكن لاحظت مؤخّرا إنّه بقى بيتناقش كتير
عمره ما كان مهمّ لإنّنا عمرنا ما كنّا في مجتمع مادّي وسريع وقاسي بالشكل ده
السؤال ده هتبقى إجابته سهلة جدّا لو انتا الأوّل سأت نفسك ( أنا عاوز إيه )
ما هو يا إمّا انتا عاوز أكبر قدر من الفلوس
يا عاوز تعيش حياة سعيدة ومتوازنة
جاوب على سؤال ( أنا عاوز إيه ) – هتلاقي معظم أسئلتك اتجاوبت لوحدها
سؤال ( أشتري عربيّة جديدة ولّا لأ )
سيبك من السؤال ده – وجاوب على سؤال ( أنا عاوز إيه )
هل انتا محتاج العربيّة الجديدة عشان شغلك بيتطلّب ده – شغلك مثلا ما ينفعش فيه عربيتك تعطل كتير – وليكن انتا شغّال في المبيعات مثلا – ف العربيّة دي بالنسبة لك ( عدّة شغل )
ولّا انتا عاوز تشتري عربيّة جديدة عشان انتا حابب يكون عندك عربيّة جديدة – حابب إحساسها – ونظرة الناس ليها
حتّى الأكل
يعني تاكل كباب وكفتة – ولّا عيش وجبنة
لو سألت نفسك سؤال ( أنا عاوز آكل ليه ) – هتلاقي نفسك حدّدت انتا هتاكل كباب وكفتة ولّا عيش وجبنة
ممكن تكون عاوز تعزم ولادك على كباب وكفتة ك جزء من فسحة
ولّا انتا عاوز تاكل عشان حاسس بالجوع في وسط الشغل وعاوز تاكل حاجة خفيفة ما تتقّلكش بحيث تعرف تكمّل شغل
السؤال الحقيقيّ دايما بيكون ( إنتا عاوز إيه )
بدل ما تقنع بنت بالحجاب مثلا بدلا من التبرّج – إسألها ( إنتي عاوزة تلبسي لبس متبرّج ليه ) – وسيبها – هيّا بعد كده هتجاوب لنفسها على سؤال ( يا ترى ألبس إيه )
يعني انتا متخيّل البنت اللي لابسة بنطلون ضيّق لابساه ليه !!
يعني هل هيّا في البيت بتلبس نفس البنطلون الضيّق – ههههههه – ما فيش حدّ في البيت هيّا عاوزاه يشوف الحاجات
بدل ما تقنع إبنك بالمذاكرة – إسأله ( إنتا عاوز تبقى إيه ) – وسيبه لوحده – ما تجادلش معاه كتير في المذاكرة
هوّا يا إمّا ذاكر – لنفسه – يا إمّا ما ذاكرش -لنفسه بردو – بسّ مش هييجي بعد كده يقول لك انتا ما قلتليش ليه – أنا قلت لك – وانتا اخترت انتا عاوز تبقى إيه
طبعا بتسيب لابنك الحرّيّة في حدود ما لا يؤذيه – لكن – لو كان الموضوع ما فيهوش أذى – ف سيبه يختار لنفسه
معظم حيرتك هتتحلّ لوحدها – لو رجعت خطوة للخلف – وسألت السؤال الصحّ