معنى إن حضرتك عندك علم . ولا تنتفع منه
هو إما /
١ /
حضرتك اتعلمت علم لا ينفع
يبقى انسى اللي اتعلمته ده . واتعلم علم نافع
العلم الذي لا ينفع . يضر
مش مجرد مش هينفع . دا هيضر
لإنه هياخد منك وقت وجهد كنت ممكن تستغلهم فيما ينفعك . فهيقلل عندك الوقت والجهد المخصصين للانتفاع . فدا هيضرك
دا غير إنه هيوهمك إنك عندك علم . فهيخليك ما تتعلمش . ودا ضرر
وهيخليك ناقم على المجتمع اللي مش مقدر علمك . ودا بردو ضرر
٢ /
اتعلمت علم غير مطلوب
شرحه شرح اللي فات
٣ /
ما اتعلمتش حاجة أصلا . ومتوهم إنك اتعلمت
طيب تعرف ازاي ؟!
قارن نفسك بالناس اللي في نفس مجال علمك . وبيكسبوا منه فلوس
شوف هما مستوى علمهم إيه . وشوف انتا فين
غالبا هتلاقي نفسك أقل بكتير منهم في العلم . وعادي
لكنك متضايق إنك أقل منكم في التكسب من العلم
٤ /
حضرتك لا توظف علمك بشكل مربح
كمثال . حضرتك متقن للغة الأسبانية إتقانا كاملا . لكنك مش شغال مترجم
فأصبح دا علم غير موظف
وعلى ذلك فقس بقى
دا غير درجات توظيف العلم
يعني ممكن واحد متقن للأسبانية يشتغل مترجم اليوم بكذا أو الصفحة بكذا
وممكن واحد مترجم بردو . يتعاقد مع كاتب أسباني على ترجمة كتاب ليه . مقابل نسبة من مبيعات الكتاب باللغة المترجم ليها . فيبقى حقق دخل أكبر . والأهم إنه دخل ( مستمر )
٥ /
حضرتك لا تجيد التسويق لعلمك
التسويق زي السواقة
المهندس والدكتور والمحاسب والمترجم بيروحوا شغلهم بالعربية
فبيتعلموا يسوقوا العربية
ما ينفعش يجيبوا سواق . وإلا هيقاسمهم في جزء كبير من ربحهم
ممكن يجيبوا سواق لما يبقى ربحهم كبير جدا . وأجر السواق يمثل نسبة قليلة من ربحهم
لكن في الأول لازم يسوقوا بنفسهم
وعشان يسوقوا بنفسهم . لازم يتعلموا السواقة
ما ينفعش يقولوا . إحنا مش شغلتنا السواقة
وإلا مش هيوصلوا لأماكن عملهم أصلا . فمش هيكسبوا
فحضرتك أيا كانت شغلتك . إنتا محتاج تسوق لهذا الشغل
حتى لو كان اللي هتبيعه هو ( علم )
٦ /
حضرتك عندك سوء تسعير لعلمك
علمك يساوي ١٠٠ ألف جنيه . وانتا بتبيعه بألف جنيه فقط . والناس مبسوطة طبعا . ما حدش هيقول لك انتا بتظلم نفسك
يبقى انتا محتاج تحسن تسعير علمك
ولما تسعر علمك بالقيمة العادلة . يبقى اللي مش هيوافق عليها فهو خارج شريحتك التسويقية أصلا . فلا تندم عليه
لا شيء غالي داخل شريحته
اللي قال لك غالي هو شخص غير مستهدف بالنسبة لك أصلا
دا بفرض إنك عامل التسعير نفسه صح
إختار الشريحة صح . واستهدفها صح . وسعر صح . هتبيع عادي . مهما كان السعر
وأسهل طريقة للتسعير . لو مش عاوز تشغل دماغك يعني . هو تسعير المنافسين
وتسعير المنافسين اللي في نفس شريحتك
٧ /
حضرتك ( بتتكسف ) تطلب حقك . عشان عالم وكده
قال يعني العالم ده لما بيروح يشتري جزمة . بياع الجزم بيبيعها له ببلاش . عشان شايفه عالم وكده
يا راجل يا محترم . تبقى الجزمة بيتدفع فيها فلوس . وعلمك ما يتدفعش فيه فلوس ؟!
فيه ناس بتطلب مني دراسة كذا . اللي عملتها قبل كده . ويستغربوا إني بقول لهم سعرهم كذا . وحجتهم ( ما انتا عاملها قبل كده ومش هتبذل فيها مجهود )
يعني بياع الجزم بييجي الصبح يبيع جزمة بفلوس . وباقي اليوم يفضل يبيع الجزم بسعر ما اشتراها بدون ربح . ما هو خد ربح مرة في أول جزمة . يبقى عاوز ربح تاني ليه ؟!!
ما تتكسفش تطلب فلوس في علمك
لإن معظم الناس مش هتتكسف تاخد علمك ببلاش
إطلب حقك عادي
لا فيها بجاحة . ولا فيها حرج
أو استمر على وضعك . وانتا هتتعلم تطلب حقك لوحدك . المهم تستمر
المشكلة إنك تتحرج مرة واتنين وتلاتة . وبعدين تقفل
لكن لو استمريت . هتتعلم تطلب حقك لوحدك
الناس هتعلمك