الآراء تحترم طبعا
لكن المشكلة إنّ الناس بتحطّ الآراء مكان المعلومات – ويبتدي العكّ بقى
فتلاقيهم بيتّهموك إنّك لا تحترم آرائهم – بينما في الحقيقة انتا لا تحترم معلوماتهم الخاطئة
وبالمناسبة اللي بيحترم المعلومة الخاطئة ده منافق – مش متحضّر يعني ولا حاجة
ما هو ده من ضمن العكّ بردو اللي أجبروا الناس عليه
خلّينا نضرب أمثلة
أنا باشرب الشاي من غير سكّر
تيجي حضرتك تقول لي – الشاي بيكون أحلى لو شربته بالسكّر
دا رأيك – وأنا أحترمه جدّا
لكن
لو قلت لك – السكّر في الشاي مضرّ
فانتا قلت لي – لا ولا مضرّ ولا حاجة – أنا طول عمري باشرب الشاي سكر زيادة وما عملّيش حاجة
هنا حضرتك بتقول معلومة خاطئة – فلا وجه لمطالبتي باحترامها
لمّا اقول لك مثلا أنا بحبّ ألبس الملابس البيضاء
فانتا تقول لي – بسّ الملابس السوداء أكثر شياكة
دا رأيك – وأنا أحترمه طبعا
لكن – لمّا اقول لحضرتك – الدنيا حرّ – والملابس السوداء هتحسّسك بالحرّ أكتر
فتقول لي لا ولا حرّ ولا حاجة
هنا حضرتك بتخرّف – وما فيش وجه لاحترام تخريفك
لمّا تقول لي مثلا إنّك بتحبّ المانجة – دا رأيك – ويحترم
لكن – لمّا اقول لك المانجة مثلا هتزوّد نسبة الأملاح في جسمك
فتقول لي – لا انا باكلها وما بحسّش بطعم الملح فيها
هنا حضرتك بتستعبط
فكلّ ما في الموضوع إنّ الناس بتنزل المعلومات الخاطئة بمنزلة الآراء الشخصيّة – وبعدين تطالبك باحترام معلوماتهم الخاطئة كما تحترم آرائهم !!
خد كلّ ما سبق بقى – وحطّه تحت معلومة كبيرة جدّا بتقول إنّ ( كلّ شيء في الدنيا يخضع لقوانين وقواعد )
حطّ المعلومة الكبيرة دي قدّام الناس اللي عايشة سبهللة – هتبقى بالنسبة لهم كابوس !!
يعني
معظم الحاجات اللي الناس بتعتبرها ( أذواق ) – هي في الحقيقة مش أذواق ولا حاجة
يعني
لو شاعر قال قصيدة – فانتا مش من حقّك تقول عجبتني أو ما عجبتنيش وتطالب الناس باحترام الرأي ده – لإنّه ما فيش رأي أصلا – دا علم وله قوانينه وقواعده
إنتا بسّ جاهل بالعلم ده – فبترجع الموضوع للأذواق
ييجي العالم في الشعر ينقد القصيدة ويطلّع عيوبها – فانتا تعتبره بيعبّر عن ( رأيه ) – وانتا بتعبّر عن ( رأيك ) – وبناءا عليه تطالبه باحترام رأيك
لا يا فندم – ده مش ( رأيك ) – دا دي ( معلوماتك الخاطئة ) – فلا احترام لها
مش مصدّق !!
أمّال ازّاي فيه مسابقات للشعر ؟!
يعني الحكّام بيحكموا ازّاي – كلّ واحد وذوقه ؟!
طاب ما تروح تقعد وسطهم – ما انتا عندك ذوق زيّهم – ولّا هوّا الموضوع ماشي كوسة يعني ولّا إيه – إنتا تفرق عنهم إيه عشان همّا يحكّموا وانتا لأ
واحد رسم لوحة – هل الموضوع هو فقط إعجاب الناس باللوحة اللي يقول هيّا جميلة ولّا لأ ؟!
لأ طبعا – الجمال ده له قوانين – أمّال ليه فيه كلّيّة اسمها ( الفنون الجميلة )
إنتا متخيّل إنّهم بيدرسوا في الكلّيّة دي إيه يعني !!
ما هي القوانين اللي بتحكم الجمال – اللي هوّا بالنسبة لك بتقول عليه ( أذواق )
هوّا أذواق بالنسبة لك فقط لإنّك ( جاهل بقوانينه )
خد الكلام ده واسقطه على أيّ مجال بقى
ساعتها هتستوعب ليه المتخصّصين في المجال ده لا يحترمون آراءك
ببساطة لأنّك مش بتقول ( رأي ) – ولكنّ لإنّك بتقول ( معلومة خاطئة )