هتعمل فلوس . لما أهم حاجة في مشروعك هتكون ( إزاي نبيع المنتج كتير . وبسرعة )
طول ما انتا في مرحلة تحسين المنتج . فانتا مش في مرحلة الفلوس
فيه فلوس بتيجي . بيتصرف منها جزء كبير على تحسين المنتج
فيه انشغال بتحسين المنتج . فمش لاقيين وقت نبيع فيه المنتج
فيه انشغال بتحسين المنتج . فمش عارفين نبيع المنتج كتير
فيه شكاوى من المنتج . فمش قادرين نبيع المنتج بسرعة . كل بيعة بتتكعبل بالشكاوى
وبناءا على الشكاوى دي . فلو بعنا المنتج كتير . هتيجي شكاوى أكتر . فاحنا محجمين البيع لحد ما نظبط الخلطة
طول ما انتا في المرحلة دي . عمرك ما هتعمل فلوس
ممكن تبيع . لكن مش هتعمل فلوس
وفلوس يعني فلوس
يعني . عشان اعطيك أرقام . فكلمة فلوس معناها صافي أرباح سنوية بعشرات الملايين
يعني مبيعات سنوية بمئات الملايين
الكلام بالجنيه
الشركات العملاقة في العالم كلها هتلاقيها مش متمحورة حول منتجها
ولكنها متمحورة حول بيع منتجها بكميات كبيرة
لكن المنتج نفسه . خلاص
طبعا فيه ناس فهمت البوست إني بقول المنتج مش مهم
فدول خدوا بلوك طبعا
إحنا لسه هنوجع في قلبنا مع الأغبياء
الغبي عقله ما يقدرش يشوف درجات الألوان في الكلام
لو قلت له ( المنتج مش أهم حاجة )
هيفهم إن ( المنتج مش مهم )
طيب ازاي نفهمه إننا نقصد إن المنتج مهم بس مش هوا الأهم ؟!
إعمل له بلوك
لو قلت له ( هتعمل فلوس ) . مش هيسمعها
هوا هياخد جملة إن المنتج مش مهم . ويتنح قدامها
طيب ازاي أفهمه إن البوست بيتكلم عن مرحلة ( عمل الفلوس ) ؟!
إعمل له بلوك
الشركات الكبيرة تخطت مرحلة ( المنتج ) . ودخلت في مرحلة ( إدارة المنتج ) . ومن هنا بتحصل تراكمات الثروة
أوبر مثلا ما بتهتمش بصيانة العربيات اللي بتشغلها
لإنه أساسا . أوبر ما عندهاش عربيات حضرتك
أوبر . بتبيع خدمة ربط حضرتك بسائق العربية . بسرعة . وكتير
دانون مثلا . شركة ألبان عملاقة . ما عندهاش أبقار
ليه ؟! وإيه علاقة الأبقار باللبن حضرتك ؟!
مش انتا عاوز لبن . خد لبن . بتسألني عن الأبقار ليه ؟!
حضرتك عاوز تشتري أبقار من دانون ؟
أمازون مثلا . ما عندهاش سوبر ماركتات
شركات السياحة . ما عندهاش طيارات
حضرتك عاوز طيارة . ولا عاوز تسافر
أير بي إن بي . ما عندهاس فنادق . حضرتك عاوز فندق . ولا عاوز تنام
فطول ما حضرتك في مرحلة المنتج . إنتا في خناقة المنتج . مش خناقة الفلوس
لو عاوز توصل لمرحلة الفلوس . حول اهتمامك لازاي تبيع المنتج بسرعة . وكتير
إزاي ؟!
لا دا سؤال ما يتسألش
كل واحد ومشروعه
وهتاخد سنين عشان تعمل ده
لو سمعت كلمة ( ثروة ) . فدي غير كلمة ( ربح )
لو اشتريت حاجة بجنيه وبعتها بجنيه وشلن . فانتا حققت ربح
لكن . حققت ثروة . يعني حققت ربح بعشرات الملايين سنويا . صافي ربح
فلو سمعت كلمة ( ثروة ) . فاعرف إننا بنتكلم عن سنين . وعن عصر دماغ
عصر دماغ . مش عضلات
العضلات في مرحلة المنتج
.
وتفهم من كلامي . إنك لازم تحط إطار لتحسين المنتج . ما يبقاش تحسين المنتج دا هدف مفتوح لما لا نهاية
يعني ما احسنش المنتج ؟!
بلوك
لازم توجه اهتمامك لبيع المنتج كتير . وبسرعة
ودا مش هيحصل إلا ب ( سيستم )
طاب واعمل السيستم ازاي ؟
دا شغلك
طاب منتجي لسه فيه مشاكل
يبقى الكلام مش ليك
طاب أنا عاوز اعمل ثروة دلوقتي
مش هتعرف
الثروة هتيجي لما تخلص مرحلة المنتج
وتعمل سيستم
يخليك تبيع المنتج كتير وبسرعة
وقتها مش مهم تكون بتصنع المنتج
مش مهم حتى تكون بتملك المنتج
صاحب الطابونة . ما بيخبزش العيش بنفسه
وصاحب مطعم البرجر . بيشتري العيش من طابونة
وشركة طلبات ما عندهاش مطاعم
هيا بتوصل لك البرجر على موتوسيكلاتها
أقول لك . شركة طلبات . ما عندهاش موتوسيكلات
واقول لك . المطعم اللي عمل البرجر . ما عندوش مطعم . دا بيعمل البرجر في مطابخ مركزية بتعمل له ولغيره
مش الفيسبوك اللي كتب البوست ده