إدارة_الأولويّات_والنفقات

الإنسان الحكيم بيكون عنده موازين لحياته
يعني – مش كلّ قرار حكيم بياخده إنتا بتتخيّل إنّه قعد يفكّر فيه كتير عشان يوصل له

بالعكس, دا هوّا تقريبا ما فكّرش فيه خالص
إزّاي ؟!
ما هو دا معنى #الموازين

الإنسان الحكيم بيعرض الموضوع على موازين ثابتة عنده – ف بيوصل بسرعة لإجابة للموضوع اللي قدّامه

من أهمّ هذه الموازين – ميزانين – هنتكلّم عنهم النهارده إن شاء الله

وهما
ميزان إدارة الأولويّات
وميزان إدارة النفقات

إدارة الأولويّات يخضع لميزان بسيط بيقسّم الأولويّات دي ل 4 درجات
وهي

1 – مهمّ عاجل
2 – مهمّ غير عاجل
3 – غير مهمّ عاجل
4 – غير مهمّ غير عاجل

#أوّلا
#المهمّ_العاجل

دي حاجة زيّ ما يكون إبنك تعبان ومحتاج يكشف مثلا
محتاج تسلّم شغل معيّن متّفق عليه في موعد معيّن
دي حاجات ما فيهاش فصال – ما ينفعش تستهتر فيها أو تأجّلها

والأهمّ !

هو إنّها لو تعارضت مع حاجة تانية من الدرجات ال 3 اللي بعد كده – ف إنتا مش محتاج تفكّر في الأولويّات – خلاص الميزان بيقول دي الأولويّة رقم 1 – ف هتعملها بدون تفكير – وبدون تخوّف من أيّ عتاب من أيّ طرف آخر ليه عندك طلب

#ثانيا
#المهمّ_غير_العاجل

زيّ مثلا لو إبنك محتاج يعمل تقويم لأسنانه
عندك عميل طلب شغل واتّفقتوا على تسليمه خلال شهر مثلا – والشغل إنتا عارف إنّه ياخد أسبوعين شغل فقط

الحاجات دي نصيحتي ليك فيها هي ( التعجيل )
يعني
باعتبار الحاجة دي مهمّة – ف هيّا كده كده هتتعمل
يبقى – استفاد بيها دلوقتي

سبب كتابة البوست أصلا هو نقاش بيني وبين المدام عن إنّنا بنعمل كراسي للسفرة بدل الموجودة حاليا لإنّها غير مريحة

بالتزامن – المدام بتجيب حاجات لرمضان – الحاجات دي منها حاجات للمطبخ – أطباق مثلا – ومنها حاجات زينة – إلخّ
بالتزامن – فيه حاجات مطلوبة للعيد – زيّ لبس العيد مثلا

ف ظهر جدّا معايا موضوع إدارة الأولويّات والنفقات ده – باعتبار المدام شايفة الحاجات دي كلّها زيّ بعضها – وباعتبار الحاجات دي كلّها جات مع بعضها في وقت واحد

ف قعدت شرحت لها اللي هاكتبه في البوست ده – وقلت أنشره على العامّ لعموم الفائدة إن شاء الله

ف لو جينا لموضوع كراسي السفرة مثلا
دي تتصنّف إيه ؟!
تتصنّف مهمّ غير عاجل

طيّب, ليه بقول لك المهمّ غير العاجل عجّل بيه
لإنّك كده كده هتعمله – يبقى استفيد من فرق الوقت لصالحك

يعني, لو عملته السنة دي – أو السنة الجاية – ف أنا لو عملته السنة دي يبقى هاستفيد بيه سنة زيادة

الحاجة التانية اللي على أساسها بانصحك تعجّل بالأمور المهمّة غير العاجلة – هيّا إنّك ما تضمنش المستقبل هيحصل فيه إيه

يعني, المشروع اللي يخلص في أسبوعين – وانتا معاك شهر على تسليمه – ما ممكن تيجي بعد أسبوعين في الوقت اللي مخطّط فيه تبدأ المشرع ده – يحصل لك ظرف

بل إنّك ممكن تتفاجيء إنّه محتاج أكتر من أسبوعين أصلا !
يبقى إيه, يبقى خير البرّ عاجله
ولّا إيه !

#ثالثا
#غير_المهمّ_العاجل

دا الخازوق بقى يا مان,
الأمور التي #تبدو مهمّة – لكنّها غير مهمّة ولا حاجة

لكن فين المشكلة ؟!
المشكلة إنّها بتكون عاجلة

ف إنتا ما بيكونش عندك فرصة تفكّر
ف بتقوم منفّذ – وتصرف – وبعدين تكتشف إنّك تصدّق البتاع اللي احنا جبناه ده مالوش أيّ 30 لازمة !!

ضغط الوقت بيحرمك من فرصة التفكير

عشان كده – لو تفتكر في بوست ( علامات النصّاب ) – إنّه من علاماته ( الصربعة ).. بيصربعك
إلحق يا ما تلحقش, فرصة ما تتعوّضش

ليه هوّا بيعمل كده ؟!
عشان يحرمك من فرصة التفكير – أو إنّك تشاور حدّ مثلا ف يقول لك لا يا عمّ ما فيش الكلام الفارغ ده

لكن – بعيدا عن النصب – إنتا بينك وبين نفسك بتعدّي عليك حاجات زيّ كده – حاجات غير مهمّة – وعاجلة

ف بقول لك انتبه – دي أخطر واحدة في ال 4 أولويّات بالمناسبة
طيّب – أعرف ازّاي ؟!

لو لقيت حاجة عاجلة – اقلق – لإنّها يا تطلع رقم 1 – يا رقم 3
ف مجرّد ظهور عنصر العجلة في أمر ما – هو علامة تنبيه
يبقى فكّر تاني في عنصر الأهمّيّة
مجرّد إنّك تقف وتفكّر – خلاص انتا في أمان إن شاء الله
لكن الخطورة هيّا في اللي بينفّذ لمجرّد وجود عنصر الاستعجال – ويبقى يفكّر بعدين

#رابعا
#غير_المهمّ_وغير_العاجل

الحاجات اللي زيّ دي حطّها في منطقة ( الوقت الضايع )

يعني إيه,
يعني مثلا – العلماء زمان – كانوا بيسيبوا أقلامهم غير مبريّة – لحدّ ما يجيله ضيف رخم مثلا – ف يقعد يتكلّم معاه – ويبري الأقلام وهوّا بيتكلّم معاه

ف كذلك انتا تعمل مع الحاجات غير المهمّة وغير العاجلة – سيبها للأوقات الضائعة

يعني – أنا مثلا بيجيلي يوم أكون فيه مرهق – عادة تاني يوم بعد سفر طويل – رحت استشارة لمصنع في برج العرب مثلا – دي تاني يوم أنا هكون خارج الخدمة – ومش هاعرف اعمل أيّ حاجة

ف باجي في اليوم ده – اليوم التاني يعني – واقعد احذف الملفّات غير المهمّة على الجهاز

ممكن اقعد اتفرّج على فيديوهات لدراسة جديدة
كلّ دراسة بتاخد لها يوم كده قاعد طول النهار كلّ اللي باعمله إنّي باتفرّج على فيديوهات لمصانع مشابهة

ف مش هاعمل ده في يوم أنا فايق فيه – ف بخلّي اليوم ده ييجي في اليوم اللي أنا فيه خارج الخدمة

اليوم ده بقوم حاشر فيه فسحة الولاد مثلا

همّا يروحوا الملاهي يلعبوا – وانا قاعد جنبهم حارس فقط – واقعد انزّل بوستات سفّ على الناس اللي حطّت فلوسها في ال fbc مثلا

ف يطلع لي ناس تقول لي ما تشمتش فيهم – دول غلابة واتضحك عليهم – دا بدل ما تساعدهم – أقوم عامل لهم بلوكّات – وهكذا – هههههههههه

دا كده الترتيب بتاع ال 4 أنواع من الأولويّات

نيجي بقى للقسم التاني من البوست

وهو – ترتيب أنواع النفقات
وللقدر – طلعوا 4 أنواع بردو, وهم

1 – الأساسيّات
2 – مشتريات من أجل الراحة
3 – مشتريات من أجل الرفاهية
4 – مشتريات من أجل الكماليّات

وقبل ما اشرح لك ال 4 أنواع دول – خلّيني أذكر لك مثل ظريف جدّا بيقول ( إنتبه للقروش – وستنتبه الجنيهات لنفسها )

take care of the pennies and the pounds will take care of themselves

طبعا دا أيّام ما كانت الجنيهات حاجة كبيرة

دلوقتي – لمناسبة العصر يعني – ممكن اقول لك ( إنتبه لمئات الجنيهات – وستنتبه آلاف الجنيهات لنفسها )

في إدارة النفقات – المشكلة الكبيرة – هي النفقات الصغيرة !
يعني – المدام بتجهّز لرمضان من 3 شهور – كإنّنا السنة دي هنصوم للعشا !! خير يا حاجّة – فيه إيه !

أنا كلّ اللي شاغلني هو تغيير كراسي السفرة – لكن – لسّه ما نفّذتش
بينما هيّا جابت ييجي 20 حاجة لحدّ دلوقتي

ليه دا بيحصل,
السبب هو إنّ تجديد السفرة من النفقات الكبيرة
لكن – اللي المدام بتجيبه هو من النفقات الصغيرة

النفقات الكبيرة – من نفسها – بتمنعك من تنفيذها – ف إنتا مش محتاج تركّز معاها – هيّا هتمنعك من تنفيذها بنفسها – دا معنى إنّ الجنيهات هتنتبه لنفسها

لكن – النفقات الصغيرة – لإنّها صغيرة – ف إنتا بتنفّذ بدون تفكير

تيجي بقى بعد 3 شهور سنكحة في شراء مش عارف فوانيس على شكل لا مؤاخذة إيه – بتنجانة

على مفارش عليها لا مؤاخذة إيه – بوجي وطمطم,
على كبّايات عليها لا مؤاخذة إيه إيه إيه إيه – إيه بسّ اللي رماك – بكّار على مش عارف إيه

تلاقيك صرفت تمن سفرة جديدة أصلا – مش تمن تجديد سفرة !!
ف دي الملحوظة الأولى – والأهمّ – في إدارة النفقات

نرجع بقى لل 4 أنواع من النفقات

#أوّلا
#النفقات_الأساسيّة

دي ما ينفق في الاحتياجات الأساسيّة للإنسان – المسكن والمأكل والملبس والدواء والتعليم

وبعد شويّة هقول لك إنّ المأكل والملبس دول فيهم نوع تاني من النفقات

ف النفقات الأساسيّة دي – مش محتاجة تفكير – ومش محتاجة حساب للأولويّات

العجيب بقى – إنّ المدام من يومين بتقول لي جنّة تعبانة – طاب ما قلتيش ليه عشان نكشف – قالت لي أنا قلت هتخفّ لوحدها

بتوفّر لي ما شاء الله – بتوفّر لي في نفقة من النفقات الأساسيّة – وعاوزة بونبونيرة للعيد – يا الناس تاكل وشّنا – هنحطّ لهم البونبوني في حجرهم يعني – كلّ واحد ياخد شويّة ملبّس في جيبه ويمشي

النفقات الأساسيّة دي لو هتوصل إنّك ( تستلف ) عشانها – مقبول

#ثانيا
#النفقات_على_المشتريات_من_أجل_الراحة

الفيصل الأساسيّ في التفريق بين ال 4 أنواع من النفقات – هو – الوظيفة

ف لو الحاجة اللي هنشتريها محتاجينها عشان وظيفة أساسيّة – تبقى نفقتها أساسيّة

ولو الحاجة اللي هنشتريها هنشتريها عشان وظيفة يمكن تنفيذها بطريقة أخرى – لكن الحاجة اللي هنشتريها هتنفّذ نفس الوظيفة بشكل أكثر راحة – تبقى نفقة من أجل الراحة

يعني – جدّاتنا كانت بتطبخ على الكانون
أمّهاتنا كانت بتطبخ على الباجور
زوجاتنا بتطبخ على البوتوجاز

ف البوتوجاز في الحالة دي هو منتج بنشتريه من أجل الراحة – وليس من أجل الوظيفة
بنتشريه من أجل آداء الوظيفة – ولكن بشكل مريح

والراحة دي حاجة نسبيّة مع الزمن
يعني – زوجاتنا دلوقتي بيعتبروا غسيل الصحون من الوظائف الأساسيّة غير المتعبة
بناتنا هيعتبروها وظيفة متعبة – لإنّ العادي في زمنهم هيكون غسّالات الصحون

على رأي المدام – بتقول لي – ما انتا اللي بتشجّع الناس يعملوا مصانع أجهزة كهربائيّة

لمّا اقول لها مثلا على حاجة زيّ الأير فراير إنّه يا بنتي مالوش لازمة
طبّاخ السمّ بيدوقه

طيّب, حكمي بردو على المشتريات من أجل الراحة إنّها من النفقات المهمّة لكن – تنزل من حيث الأولويّات
من ( مهمّ عاجل ) – ل ( مهمّ غير عاجل )

#ثالثا
#النفقات_من_أجل_الرفاهية

إذا كانت النفقات من أجل الراحة عرفناها بإنّها شراء حاجة بغرض الراحة
ف المشتريات من أجل الرفاهية غرضها شراء حاجة بغرض #المزيد_من_الراحة

يعني, العربيّة مثلا هي من النوع التاني من المشتريات – النوع الأوّل هوّا التاكسي والميكروباص والموتورجل
لكن – إنّ العربيّة يكون فيها مساج وتبريد وتسخين في الكراسي مثلا – ف كده انتا نقلت لبند الرفاهية

البوتوجاز مثلا مشتريات راحة
النوع الأوّل هو الباجور والكانون
يا عيني على الكانون ده – قالبين طوب كده – وتحتهم حطب بيتحرق
كان غرام – وخصوصا في المحشي – كانت ريحة الدخّان بتدخل للأكل ف تدّي له طعم خطير
ولو هتعمل شاي – يبقى ع الراكية – يا نهار أبيض متوسّط

لكن – الأير فراير مشتريات رفاهية
حلّة الرزّ من مشتريات الرفاهية
جهاز سلق البيض من مشتريات الرفاهية
جهاز الفيشار من مشتريات الرفاهية
جهاز الوافل العجيب – من مشتريات الرفاهية

المكنسة الكهربا مثلا من مشتريات الراحة – المقشّة هي المنتج الأساسيّ
لكن, المكنسة الروبوت من مشتريات الرفاهية

طيّب – حكمي على مشتريات الرفاهية – هي إنّك تجيبها لو متيسّر جدّا – مش غير كده

والزوجة تفهم ده – ف ما تلحّش في طلب حاجة هي من مشتريات الرفاهية

قلنا لك المشتريات الأساسيّة هنجيبها لك دلوقتي حتّى لو هنستلف
مشتريات الراحة هنجيبها لك – لكن مش شرط دلوقتي – مهمّ وغير عاجل
لكن – مشتريات الرفاهية دي لمّا نبقى نغتني إن شاء الله

قال تعالى
لِيُنفِقْ ذُو سَعَةٍ مِّن سَعَتِهِ ۖ وَمَن قُدِرَ عَلَيْهِ رِزْقُهُ فَلْيُنفِقْ مِمَّا آتَاهُ اللَّهُ ۚ لَا يُكَلِّفُ اللَّهُ نَفْسًا إِلَّا مَا آتَاهَا ۚ سَيَجْعَلُ اللَّهُ بَعْدَ عُسْرٍ يُسْرًا

اللي قادر يجيب – يجيب من غير ما حدّ يطلب منّه
واللي مش قادر يجيب – ما يجيبش – وما حدّش يلومه
فيه قانون أبسط من كده !

بالمناسبة, موضوع الرفاهية مذكور أيضا في القرآن

قال تعالى
يَا بَنِي آدَمَ قَدْ أَنزَلْنَا عَلَيْكُمْ لِبَاسًا يُوَارِي سَوْآتِكُمْ وَرِيشًا ۖ وَلِبَاسُ التَّقْوَىٰ ذَٰلِكَ خَيْرٌ ۚ ذَٰلِكَ مِنْ آيَاتِ اللَّهِ لَعَلَّهُمْ يَذَّكَّرُونَ

قلنا الفيصل هو إيه ؟!
الوظيفة

طيّب, ربّنا سبحانه وتعالى قال على النوع الأوّل ( يواري سوآتكم ) – دي الوظيفة – وظيفة اللبس
ف دا لبس من النوع الأساسيّ

النوع التاني بقى هو ( ريش ) – يعني الهدوم اللي غرضها الزينة والفخامة – يقول لك فلان دا متريّش – يعني غنيّ

في نفس السياق – إفتكر إنّي قلت لك على المتطلّبات الأساسيّة الخمسة – المسكن والملبس والغذاء والدواء والتعليم – قلت لك هارجع لك في نقطة المأكل والملبس

هنا بيبان عنصر #الإسراف
الإسراف بيكون في الحلال
يعني – لو هتشتري خمرة مثلا – دا حرام
لو هتشتري عصير – دا حلال
طيّب – لو هتشتري عصير #كتير فوق احتياجك – دا إسراف !

الفيصل في الإسراف هو ( مقدار الحاجة )
إنتا يكفيك في السنة مثلا 4 قمصان – اتنين في الصيف واتنين في الشتاء
لو جبت 12 قميص في السنة – مش حرام – لكنّه ( إسراف )

قال تعالى
وَكُلُوا وَاشْرَبُوا وَلَا تُسْرِفُوا إِنَّهُ لَا يُحِبُّ الْمُسْرِفِينَ

إنتا ممكن تقسّم الناس في السياق ده ل 5 درجات
بخيل
فقير
مقتصد
مسرف
مبذّر

البخيل – معاه فلوس يشتري احتياجاته – لكن ما بيشتريهاش
الفقير – ما عاهوش فلوس يشتري احتياجاته
المقتصد – معاه فلوس يشتري – لكن بيشتري احتياجاته فقط
المسرف – معاه فلوس – وبيشتري فوق احتياجاته
المبذّر – معاه فلوس – وبيشتري حاجات ضارّة

ف خلّيك مقتصد, تقول الحكمة ( ما عال من اقتصد )

ويقول سيّدنا عمرو بن العاص رضي الله عنه – حبيبي الثالث بعد سيّديّ عمر ومعاوية
يقول: لا أملُّ ثوبي ما وسعني، ولا أملُّ زوجتي ما أحسنت عشرتي، ولا أملُّ دابَّتي ما حَمَلَتْني ؛ إنَّ الملال من سيِّىء الأخلاق

#رابعا
#الكماليّات

قلنا الفيصل في تحديد درجة أولويّة الإنفاق – هو الوظيفة

الراحة منتج بنشتريه من أجل وظيفة الراحة

الرفاهية بنشتريه من أجل وظيفة الراحة الزائدة

الكماليّات بقى بنشتريها من أجل وظيفة الولا حاجة – أهي مرقعة كده وخلاص

حاجة مثلا زيّ ما تشتري صورة فيها أناناساية تحطّها على الحيطة – ولا ليها أيّ سبعين لازمة – بسّ الناس هتاكل وشّنا – يدخلوا علينا في العيد ما يلاقوش عندنا أناناساية ع الحيطة – يا شماتة أبلة ظاظا فيّا

طيّب – ودي علاجها إيه
علاجها هو وضع سقف للكماليّات
يعني – هنشتري كماليّات حاضر – وهجيب لك صور أناناسات كتير ع الحيطة حاضر – لكن – بما لا يتخطّي مبلغ كذا في الشهر

ف بكده نكون حلّينا الخلاف
لا نقول مش هنجيب كماليّات خالص – ف الزوجة تزعل
ولا نقول هنجيب كلّ الكماليّات – ف الزوج يطقّ

ولكن – هنجيب في حدود مبلغ كذا – خلص المبلغ ده – وعاوزة تجيبي كماليّات تانية – يبقى الشهر الجايّ وعليكي خير إن شاء الله

محتاجة تجيبي كماليّة أغلى من مبلغ الشهر – حوّشي لها شهرين

طبعا حضراتكم محتاجين تقعدوا بقى وتتّفقوا إيه في حياتنا من الراحة وإيه من الرفاهيّات وإيه من الكماليّات

الأساسيّات مش محتاجة اتّفاق – هيّا معروفة

يعني – مثلا – الأكل اللي هنطبخه في البيت – دا أساسيّات

طيّب – لو هاخد الولاد أعزمهم في مطعم – دا من الراحة

إنتا في البيت ما وفّرتش ولا حاجة – إنتا كنت بردو هتصرف – والمدام كانت هتطبخ – وهتغسل الصحون

ف لو كلتم في مطعم – ف الأكل ده انتقل من الأساسيّات – للراحة

طيّب – لو هتاخدهم بقى كافيه – يشربوا عصير وياكلوا آيس كريم – دي كده رفاهية – مش راحة – لإنّ الآيس كريم دا مش غدا حضرتك-

طيّب – لو هتجيب للولاد ألعاب مثلا وانتوا راجعين – دي كده كماليّات

البند الأوّل – دا أساسي – تجيبه حتّى لو هتستلف
البند التاني غير عاجل
البند التالت لو الدنيا متيسّرة
البند الرابع يكون ليه سقف لا يتخطّاه

ف – افتكر معايا كده – تعالى نلمّ المنهج يعني

الأولويّات أربعة:
1 – مهمّ – و – عاجل
2 – مهمّ – و – غير عاجل
3 – غير مهمّ – و – وعاجل
4 – غير مهمّ – و – غير عاجل

والنفقات أربعة:
1 – أساسيّات
2 – راحة
3 – رفاهية
4 – كماليّات

وبالتوفيق للجميع لكلّ خير

المصدر