– أكبر عيوبي اني طيب.
باصدق الناس على طول وشايفهم كلهم كويسين، بادّي الأمان ومش باخوّن.
– وإيه المشكلة في كده؟
– ما انا دايما باخد فوق دماغي، باتظلم ويتنصب عليا ويتقال كلام عليا في ظهري من أقرب الناس ليا وباتحمل قسوة كتير وغدر صحاب و و و.
– اه هااا..
يبقى ايه اكبر عيبين عندك؟
– عيبين؟ لأ أنا كنت باتكلم عن عيب واحد.
– ما تزعلش مني، عندك عيبين مهمين انت مش شايفهم أصلا..
– ازاي بقى؟
– العيب الاولاني هو انك مش بتتطور، بتتعامل بطريقة واحدة من غير ما تتعلم من كل موقف بتمر عليه.
– بمعنى؟
– يعني لما حد زوّق الكلام ودخل عليك بوعود وأرقام صدقته واديته فلوسك، وبعدين نصب عليك، انت اتصرفت بطبيعتك مش مشكلة، بس لما اتكرر الموقف كررت نفس الغلطة كأنك ما اتعلمتش المفروض تعمل ايه في الموقف ده.
– هممم
– ولما اتعرفت على حد وحبيته وافترضت فيه الخير وطلع سيء وأذاك ده كان موقف عادي ومش عيب فيك، بس لما حصل تاني مع حد تاني من غير ما تكون اتعلمت حاجة أو طورت نفسك ده كده عيبك.
– أيوه.
– ولما…
– ثواني بس، ما انا ما ينفعش أتغير وابقى مش كويس زيهم! أولا أنا شخصيتي مش هتقبل ده فمش هاعرف، ثانيا هيبقى ايه الفرق بيني وبينهم لما أتعلم اللي بيعملوه واعمله؟
– تمام..
نفترض ان فيه تِعبان آذاك وانت اتضريت قوي،
هتعمل ايه؟ هتتحول تبقى تِعبان زيه وتمشي تنشر الأذى بين الناس؟
– لأ طبعا!
– أُمّال؟
– هاشوف ايه اللي حصل وما كنتش واخد بالي منه فهو آذاني، هل فيه حاجة كنت المفروض أعملها أو آخد بالي منها؟ وأعرف طبعه وطريقة تصرفه برضو، كده هأمن شر بقية التعابين قدر الإمكان بعد كده.
– بس كده، هو ده المطلوب.
– فهمت المقصود.
طيب ايه العيب التاني؟
– ان عقلك غلّف العيب الأولاني في هيئة ميزة، فافتكرت ان مشكلة عدم التعلم من المواقف وعدم التطور جزء من ميزة انك طيب.
– …
– كونك طيب دي ميزة ممتازة، كونك بتفترض الخير في الناس حاجة جميلة، مالهاش علاقة بأنك مش بتتعلم من اللي بتمر بيه، الاتنين مش تبع بعض، دي ميزة مع نفسها وده عيب مع نفسه.
– طيب يفرق في ايه؟ ايه المشكلة في اني اشوفهم مرتبطين؟
– من غير ما تشوف كل حاجة جواك على حقيقتها من غير تغيير أو تحوير مش هتقدر تعرف مشكلتك ومش هتقدر تتعامل معاها وتظبطها، طول ما انت شايف عدم التعلم جزء من كونك طيب وابن حلال ايه الدافع اللي هيحركك للتغيير؟
– أنا فعلا عمري ما فكرت ان فيه حاجة المفروض أعملها عشان ما أمرش باللي بامر بيه.
– لو الموضوع وضح لك دلوقتي خش ع العيب الأولاني واتعلم من كل موقف بتمر بيه عشان تبقى عارف ايه الصح وايه الغلط وتقدر تطور نفسك للموقف اللي بعده، وهكذا.
– شكرا.