أنا كتبت قبل كده إني بقسم الحياة لمراحل . مدتها ٥ سنوات
ممكن جدا حضرتك تقول إن دا أسلوبي الخاص . ودا مريحك على كده . والناس مش ملزمة كلهم يعملوا زيك
ولا كل واحد يقدر يغير حياته خلال ٥ سنين.
الحقيقة
والصدمة !!
إنك حتى لو مش بتتبع أسلوب دورة ال ٥ سنين بتاعتي
فالحياة هتطبق عليك أسلوب ( دورة ال ١٠ سنين ) بتاعها !!!!!.
مش بمزاجك
غصب عنك
الحياة هتقلبك كل ١٠ سنين
مش بمزاجك
دا غصب عنك.
حضرتك لو ظليت في نفس شغلانتك لمدة ١٠ سنين . هتكتشف الآتي . أو واحدة من الآتي.
١- حضرتك بقيت أضعف بدنيا من إنك تكمل في نفس الشغلانة.
٢- فيه شباب جداد ظهروا مستعدين يشتغلوا بنصف راتبك.
هيا مش كده بالظبط
هيا إن نصف راتبك كافي ليهم في بدايات حياتهم . لكن إنتا التزاماتك هيا اللي تضاعفت
وراتبك زي ما هوا . لإنك ما زلت بتقدم نفس القيمة.
وصاحب الشغل مش بيعطي الراتب على السن . هوا بيعطيه على القيمة
إلا لو كنت في الحكومة . ودي ضعف الراتب فيها ضعيف أصلا.
٣- اكتشفت الحقيقة متأخر . جيت تنتقل لشغلانة أعلى . ما عرفتش
الشغلانة الأعلى محتاجة معرفة زيادة إنتا ما اشتغلتش على اكتسابها خلال ال ١٠ سنين.
أنا بالنسبة لي لما حد بيبعت لي السي في بتاعه . والاقيه خبرة أكتر من ١٠ سنين في مجاله . باعتبر إن دي محاولة فاشلة إني ألاقي له شغل.
أبسط تعليق من صاحب العمل . إن دا حد خلاص اشتغل ١٠ سنين في المبيعات مثلا . فلازم ييجي عندي يشتغل مدير مبيعات . مش هينفع اشغله مندوب مبيعات . ما عادش عنده طاقة . وأنا ما عنديش مكان فاضي لمدير مبيعات.
دا مهندس إنتاج خبرة أكتر من ١٠ سنين . دا لازم ييجي يمسك مدير إنتاح . وأنا مش محتاج مدير إنتاج . ولا هوا هينفع يشتغل مهندس إنتاح تاني.
إنتبه الحقيقة دي
الدنيا هتقلبك كل ١٠ سنين
غصب عنك
مش بمزاجك.
لو تقدر انتا تقلبها كل ٥ سنين يبقى أحسنت
ما تقدرش ؟ يبقى ما تعديش ١٠ سنين
وإلا هيا اللي هتقلبك.
وافتكر مثال الضفدعة اللي حطوها في حوض فيه ميه
وبدؤوا يسخنوا الميه.
في الأول الضفدعة قالت لما الميه تسخن هنط
مع الوقت سخونة الميه أنهكت الضفدعة . فما بقتش قادرة تنط !!